Burun tutulması ciddi fəsadlara yol aça bilər - DİQQƏT

Sinüzit – burun ətrafındakı sümüklərdə yerləşən və selik ifraz edən boşluqların iltihablanması nəticəsində yaranan xəstəlikdir. Müddətinə görə 4 həftədən az davam edərsə, bu, "akut", 12 həftədən çox davam edərsə isə "xroniki sinüzit" adlanır. Alergiya, viruslar, kimyəvi qıcıqlanma, burun sümüyünün əyriliyi kimi səbəblər sinüs yollarının tıxanmasına və ya burunun təmizləmə mexanizminin pozulmasına gətirib çıxarır ki, bu da bakteriyaların sinüslərə daxil olaraq infeksiyaya səbəb olmasına şərait yaradır. Həm kəskin, həm də xroniki forması olan bu xəstəlik böyüklərdə gündəlik fəaliyyətlərə mane olur və iş qabiliyyətini aşağı salır.

Pravda.az sinüzit və müalicə üsulları ilə bağlı məlumatları təqdim edir:

Sinüzit həm fiziki, həm də psixoloji problemlər yarada bilər

Sinüzitə uzun müddət laqeyd yanaşıldıqda həm fiziki, həm də ruhi vəziyyətə mənfi təsir göstərir. Dad və qoxu duyğularında zəifləmə müşahidə olunur ki, bu da uzun müddət davam etdikdə stress və narahatlığa səbəb ola bilər. Burun tutulması 10 gündən çox davam edir, burundan sarı-yaşıl rəngli axıntılar gəlir, baş ağrısı keçmir, bədəndə yorğunluq və süstlük yaranır. Geniz axıntısı və ağız qoxusu müşahidə olunur. Daimi burun tutulması və geniz axıntısı nəfəs almağı çətinləşdirir və yuxu keyfiyyətini aşağı salır. Yorğunluq və halsızlıq iş performansını zəiflədir. Alın, göz ətrafı və yanaqlarda hiss olunan təzyiq və ağrı gündəlik fəaliyyətlərə mənfi təsir göstərir. Müalicə edilmədiyi halda sinüzit inkişaf edir və ətraf toxumalara yayıla bilər.

Böyüklərdə hər 5 antibiotik reseptindən biri sinüzitə yazılır

Akut bakterial rinosinüzit (ABRS) böyüklərdə hər 5 antibiotik reseptindən birinə səbəb olur və bu, onu antibiotiklərin beşinci ən çox təyin olunan səbəbinə çevirir. Tənəffüs əlamətləri olan uşaqların təxminən 6-7%-ində akut rinosinüzit müşahidə olunur. Hər il böyüklərin təxminən 16%-nə ABRS diaqnozu qoyulur.

Xroniki sinüzit cərrahi üsullarla müalicə edilə bilər

Sinüzit müalicəsində ilk mərhələ dərman müalicəsidir. Lakin dərmanlara cavab verməyən, davamlı və ağır hallarda, eyni zamanda mürəkkəb sinüzitlərdə endoskopik sinüs cərrahisi tövsiyə olunur. Bu üsul sinüs yollarını təmizləyərək iltihabın təkrarlanmasının qarşısını alır. Endoskopik Sinüs Cərrahiyəsi "qapalı əməliyyat" adlandırılan üsulla, ümumi anesteziya altında aparılan və 2-4 saat davam edən cərrahi müdaxilədir. Xəstə 1-2 gün xəstəxanada qalır və təxminən 1 həftə ərzində gündəlik həyatına qayıda bilir. Əməliyyatdan sonra digər burun cərrahilərində olduğu kimi tampon tətbiq olunur. Xəstələr qısa müddətdə normal həyat tərzinə dönür.

Əminə Bayramova

Tarix: 25 Aprel 2025, 17:18

Xəbər lenti