Azərbaycan Avropa məkanı üçün olduqca önəmli dövlətdir - RƏY

“Avropa İttifaqının (Aİ) Xarici siyasət və təhlükəsizlik məsələləri üzrə ali nümayəndəsi Kaya Kallas Azərbaycana rəsmi səfəri çərçivəsində cənab Prezident İlham Əliyevlə, eyni zamanda xarici işlər naziri Ceyhun Bayramovla görüşdü. Bu səfər və keçirilən görüşlər deməyə əsas verir ki, Avropa İttifaqı Azərbaycanla əlaqələrin önəmini kifayət qədər ciddi qəbul edir. Görüşdə Azərbaycan Prezidenti tərəfindən belə bir fikir səsləndirildi ki, Azərbaycan Aİ üçün önəmli tərəfdaşdır. Bu, sözün əsl mənasında belədir. Məlumdur ki, Azərbaycan artıq Avropa məkanının enerji təhlükəsizliyinin bir parçasına çevrilib. Azərbaycan artıq Avropanın on ölkəsinə, o cümlədən Avropa İttifaqının 8 üzvü olan ölkəyə qaz nəql edir. Qaz təchizatının iki dəfə də artırılması nəzərdə tutulur. Bu mənada, Aİ dövlətləri Azərbaycanla münasibətlərin genişləndirilməsində maraqlı olmalıdırlar. Ən azından proses bu istiqamətdə davam etməkdədir”.

Bu sözləri Pravda.az-a açıqlamasında Milli Məclisin deputatı Arzuxan Əlizadə deyib.

Milli Məclisin İnsan hüquqları komitəsinin sədr müavinindən Əvəz Zeynallı ilə bağlı AÇIQLAMA Pravda.az

Deputat xatırladıb ki, Azərbaycan Aİ-nin 27 ölkəsindən 10-u ilə strateji tərəfdaşlıq haqqında müqavilələr imzalayıb: “Biz üzərimizə götürdüyümüz öhdəliklərə sadiqik. Bunu dəfələrlə təkcə sənədlərdə deyil, eyni zamanda əməldə də sübut etmişik. Təəssüf ki, Avropanın bir sıra qurumları, Avropa parlamenti, Avropa Şurası Parlament Assambleyası çərçivəsində Azərbaycana qarşı olduqca ədalətsiz, birtərəfli, ən azından dost olmayan mövqe sərgilənir. Heç bir ölkə bizə yuxarıdan aşağı baxa bilməz. Bütün bunlara rəğmən dəfələrlə bəyan etmişik ki, Avropa ölkələri ilə münasibətlərin bərabər hüquqi əsaslarda, münasibətlərimizin normal məcrada inkişafında maraqlıyıq. Bu istiqamətdə Azərbaycanın fəaliyyəti davam edir. Kaya Kallas Ceyhun Bayramovla da görüşdə bəyan etdi ki, Azərbaycan Avropa məkanı üçün olduqca önəmli dövlətdir. Kallasın səfərini əslində bu kontekstdə qiymətləndirmək olar ki, Avropa rəsmilərinin Azərbaycana olan marağı Avropa ölkələrinin öz maraqları kontekstində də olduqca önəm daşıyır. Əslində Kallasın səfəri yeni bir mərhələnin başlanğıcı kimi də qəbul edilə bilər. Yeni bir səhifə açılır. Nəhayət, Aİ də fərqindədir ki, Azərbaycanla münasibətlərin normal məcrada inkişafı, Azərbaycanın bölgə üçün əhəmiyyəti Avropa ölkələri, onların dövlət və digər maraqları üçün də önəmlidir. Hesab edirəm, bu mövqe Kallasın timsalında açıqlandı. Azərbaycanın coğrafi mövqeyi də Avropa ölkələri üçün böyük maraq kəsb edir. Ölkəmizin Asiya ilə, Çinlə və digər ölkələrlə əməkdaşlığı, iqtisadi münasibətləri, son illər yeni infrastruktur layihələri ilə gündəmə gəlməsi, tranzit ölkə kimi Asiyadan Avropaya, Avropadan Asiyaya əsas keçid məntəqəsində olması Azərbaycanın əhəmiyyətini önə çəkir. Bundan sonrakı dönəmdə də Azərbaycanla münasibətlərin həm iqtisadi, həm siyasi baxımdan bir qədər də istiləşməsində, digər müstəvilərdə əməkdaşlığın genişlənməsində maraqlı olduqları görünür. Kallasın səfəri də bu kontekstdə reallaşıb. Bütün bunlar deməyə əsas verir ki, gələcəkdə Azərbaycan və Avropa münasibətləri daha müsbət məcrada inkişaf edəcək”.

Aytəkin Qardaşova

Tarix: 26 Aprel 2025, 08:38

Xəbər lenti