Erkən yaşda kosmetika istifadəsinin 5 təhlükəsi

Son zamanlarda kosmetik məhsulların uşaq və yeniyetmələr tərəfindən daha tez-tez istifadə olunması, bu məhsulların sağlamlıq üzərindəki təsirləri ilə bağlı narahatlıqları artırıb. Uşaqların dərisinin böyüklərlə müqayisədə daha incə və həssas olması, eləcə də hormon sistemlərinin inkişaf mərhələsində olması, bu məhsullardakı kimyəvi maddələrin təsirini daha da təhlükəli edir.Kiçik miqdarda kimyəvi maddələr belə ciddi hormonal dəyişikliklərə və digər sağlamlıq problemlərinə səbəb ola bilər. Erkən yaşda kosmetik məhsullardan istifadə allergiyadan tutmuş hormon pozğunluqlarına qədər ciddi fəsadlara yol aça bilər.

Pravda.az erkən yaşda makiyaj vasitələrinin istifadəsinin yaratdığı beş əsas təhlükəni təqdim edir:

Dəri qıcıqlanması və allergik reaksiyalar:
Ətirlər, parabenlər, rəngləndiricilər və qoruyucu maddələr kimi tərkib hissələri uşaqların dərisində qızartı, qaşınma və səpkilərə səbəb ola bilər. Bu, kontakt dermatit və digər dəri xəstəliklərinə gətirib çıxara bilər. Göz kosmetikası (maskara, kölgə, layner) göz ətrafında qızartı və sulanma yarada, dodaq məhsullarının udulması isə toksik təsir göstərə bilər.

Məsamələrin tıxanması və sızanaq:

Tonal krem, pudra və bəzi nəmləndiricilər uşaqların məsamələrini tıxayıb sızanaq yaranmasına səbəb ola bilər. Dəri tipinə uyğun olmayan məhsullar və düzgün təmizlənməyən makiyaj problemi daha da artırır.

Yoluxucu xəstəliklər:

Uşaqların kosmetik məhsulları paylaşması virus və bakteriyaların yayılmasına şərait yaradır. Bu isə xüsusilə göz infeksiyalarına (məsələn, konjonktivit) səbəb ola bilər.

Hormonal pozğunluqlar:

Fitalatlar, parabenlər, bisfenol A və triklosan kimi kimyəvi maddələr uşaqlarda hormonal balansı poza bilər. Bu maddələr erkən yetkinlik, reproduktiv problemlər, tiroid funksiyalarında pozulma və xərçəng riskini artıran amillər kimi göstərilir. Bəzi keyfiyyətsiz məhsullarda hətta ağır metallar (qurğuşun, civə və s.) aşkarlana bilər ki, bu da sinir sistemi və inkişaf üçün təhlükədir.

Psixoloji təsirlər:

Makiyaj vərdişi uşaqlarda erkən yaşda yetkin davranış modellərinin formalaşmasına səbəb ola bilər. Bu isə özgüvən çatışmazlığı, öz bədəninə qarşı tənqidi yanaşma və digər psixoloji problemlərlə nəticələnə bilər.

Mütəxəssislər xəbərdar edir:

Makiyaj əvəzinə uşaqlara təbii və təhlükəsiz alternativlər (məsələn, üz boyası) təklif olunmalıdır.

Hipoalergen, toksik olmayan və sertifikatlı məhsullara üstünlük verilməlidir.

Məhsulların tərkibi diqqətlə oxunmalı, paraben, fitalat və triklosan kimi maddələrdən uzaq durulmalıdır.

Makiyajdan sonra dəri mütləq təmizlənməlidir.

Əgər istənilməyən reaksiya və ya narahatlıq yaranarsa, dərhal dermatoloqa müraciət edilməlidir.

Əminə Bayramova

Tarix: 29 Aprel 2025, 16:52

Xəbər lenti