Rəşad Məcid: “Mətbuat Şurasının hansısa jurnalistin yaradıcılıq azadlığını məhdudlaşdırmaq kimi səlahiyyəti yoxdur”

Xalq artisti, Akademik Milli Dram Teatrının tanınmış aktyoru Əli Nur sosial şəbəkə vasitəsilə Azərbaycan Mətbuat Şurasının sədri Rəşad Məcidə müraciət ünvanlayıb. Aktyorun müraciəti onun bir müddət əvvəl həmkarı Füzuli Hüseynovla yaşadığı insident və bu barədə mətbuatda gedən yazılar fonunda ortaya çıxıb.

Əli Nur mediada yayımlanan həmin məlumatlarda teatrın bədii rəhbəri, Əməkdar incəsənət xadimi Mehriban Ələkbərzadənin adının məqsədli şəkildə hallandırılmamasına etiraz edib. O, bəzi media orqanlarının hadisəyə Mehriban Ələkbərzadə ilə bağlı hissəni qəsdən çıxardığını və ya ona toxunmadığını vurğulayaraq, bunu Mətbuat Şurasının sədri Rəşad Məcid ilə Mehriban Ələkbərzadə arasında mövcud olan dostluq münasibətləri ilə əlaqələndirib.

Əli Nur bildirib ki, jurnalistlər baş verən hadisələri tam və obyektiv şəkildə təqdim etməlidirlər və şəxsi münasibətlər medianın informasiya azadlığına maneə yaratmamalıdır. Xalq artisti hesab edir ki, Mətbuat Şurasının rəhbəri bu cür hallara biganə qalmamalı, medianın prinsipiallıq və obyektivlik meyarlarını qoruması üçün məsuliyyət daşımalıdır.

Məsələyə Rəşad Məcidin reaksiyası gecikməyib. Mətbuat Şurasınən sədri ona ünvanlanan müraciətə elə sosial şəbəkə üzərindən cavab verib:

"Hörmətli Xalq artisti Əli Nurun mənə ünvanladığı və Əməkdar artist hörmətli Mehriban Xanlarovanın da feysbuk sosial şəbəkəsində paylaşdığı Açıq məktubu oxudum.

Əvvəla, Mətbuat Şurasının hansısa media subyektinin, yaxud jurnalistin yaradıcılıq azadlığını məhdudlaşdırmaq kimi səlahiyyəti yoxdur. İkincisi, mən özüm də bir il Akademik Milli Dram Teatrının Bədii Şurasının üzvü olmuşam. Teatrın aktyorları ilə gözəl təmaslarım, hər birinə dərin hörmətim var. Sənət adamları mənim üçün böyük dəyərdir. Bu dəyər tərəfkeşlik kimi primitiv saydığım əmələ qurban verilə bilməz.

Şəxsi mövqeyimə gəldikdə, mən sənət cameəsindəki intriqaların ictimai müzakirələr müstəvisinə çıxmasının tərəfdarı deyiləm. Fikrimcə, cəmiyyətə örnək şəxslərin adları yalnız onların yaradıcılıqları müstəvisində gündəmə gəlməlidir. Akademik Milli Dram Teatrı kollektivinin üzvləri də bu kateqoriyadan olan şəxslərdirlər. Arzu edərdim ki, onlar teatrın daxili problemlərinə, qəlizləşən münasibətlərə teatrın özündə müzakirələrlə aydınlıq gətirsinlər, çıxış yolları tapsınlar. Belə yanaşma daha optimaldır, ziyalı ampluasına xas davranışdır, ən əsası daha etikdir.

Təəssüf edirəm ki, aktyorlar və teatr rəhbərliyi arasında münasibətlər yaradıcılıq müstəvisindən çıxıb, ictimaiyyətin də arzulamadığı cılız intriqalara yönəlir. Belə xırda intriqaların mətbuata çıxarılması isə ilk növbədə ehtiram bəslədiyimiz sənət adamlarının nüfuzuna xələl gətirir.

Mətbuat Şurasının fəaliyyət prinsiplərində əsas olan medianın, habelə cəmiyyətin maraq və mənafelərinin qorunmasıdır. Biz daim buna əməl etməyə çalışırıq.

Sonda bir daha kin və qəzəbin səmimi münasibətləri üstələməyəcəyinə böyük ümidimi, sənət adamlarımızın təmkininə inam və ehtiramımı bildirirəm".

Tarix: 9 İyun 2025, 20:33

Xəbər lenti