Abşeron rayonunda şəhidlərimiz və onların ailə üzvləri növbəti dəfə ziyarət olunub - FOTOLAR

Azərbaycan xalqının döyüş meydanında düşmən üzərində şanlı qələbə qazandığı Vətən Müharibəsində, o cümlədən düşmənin hərbi təxribatlarının qarşısını alarkən şəhidlik zirvəsinə ucalan qəhrəmanlarımız Abşeron rayonunda növbəti dəfə yad edilib, onların anım və doğum günlərində məzarları ziyarət olunub, övladlarına və ailə üzvlərinə baş çəkilib, doğum günlərində şənliklər təşkil olunub.

Pravda.az xəbər verir ki, .şəhidlərimizin anım tədbirlərində Abşeron Rayon İcra Hakimiyyətinin başçısı Abdin Fərzəliyev, RİH-in məsul əməkdaşları, şəhid ailələri və müharibə iştirakçıları iştirak edib.

Vətənimizin bütövlüyü uğrunda şəhid olmuş Heydərov Qadir Ədalət oğlunun, şəhid Vidadi Zalovun atası, Abşeron Ağsaqqallar Şurasının sədri Nizami Zalovun, şəhid Babək Allahverdiyevin anası Əsmər Allahverdiyevanın, şəhid Müsal Musayevin, şəhid Elşad Həsənovun, şəhid Elçin Həsənlinin və şəhid İşiyev Rəfailin oğlu Hüseyn İşiyevin doğum günlərində şəhidlərimizin məzarları ailə üzvləri ilə birgə ziyarət olunub, məzarları üzərinə çiçəklər düzülərək xatirələri ehtiramla yad edilib, ruhlarına dualar oxunub. Şəhidlərimizin əvvəllər yaşadıqları evlərinə baş çəkilib, onların ailə üzvləri ilə görüşülərək qayğıları ilə maraqlanılıb.

O cümlədən Xırdalan şəhərində yerləşən Heydər Əliyev Mərkəzində şəhid Rauf İbadov haqqında yazılan, Vaqif Rəsul və Azər Hacıbəylinin müəllifi olduğu “Rənglər aləmindən gələn nağıllar” və “Haqq rəssamı” kitabları təqdim olunub. Eyni zamanda şəhidimizin həyat və fəaliyyətinə həsr olunmuş sənədli film nümayiş edilib.

Tədbirdə, eləcə də şəhid ailələri ilə görüşlərdə RİH başçısı Abdin Fərzəliyev çıxış edərək Müzəffər Ali Baş Komandan cənab İlham Əliyevin rəhbərliyi, şəhidlərimizin və qazilərimizin şücaəti ilə Azərbaycan xalqının düşmən üzərində qazandığı şanlı qələbədən danışıb. Şəhidlərimizin, igidlərimizin şücaətindən, ordumuzun düşməni diz çökdürən qəhrəmanlıqlarından söz açan Abdin Fərzəliyev işğaldan azad olunan rayon və kəndlərimizdə surətli şəkildə bərpa-quruculuq işlərinin aparıldığını və soydaşlarımızın böyük sevinclə öz yurdlarına döndüyünü vurğulayıb.

Şəhid ailələri də öz növbələrində onlara daim diqqət və qayğının göstərildiyini, şəhidlərimizin xatirəsinin əbədiləşdirilməsi istiqamətində müxtəlif tədbirlərin keçirildiyini qeyd edərək, bütün bunlara görə Azərbaycan Respublikasının Prezidenti cənab İlham Əliyevə və Birinci Vitse-prezident Mehriban xanım Əliyevaya minnətdarlıqlarını bildiriblər.

Fotoları təqdim edirik