“Konkret.az”ın baş redaktoru: “Rəqabət bizi narahat etmir”

“Konkret.az” saytı bu gün 6 yaşını qeyd edir. 2019-cu il iyulun 2-də fəaliyyətə başlayan sayt qısa müddət keçməsinə baxmayaraq, Azərbaycan mediasında özünəməxsusluğu ilə seçilir, ölkəmizdə və dünyada baş verən xəbərlərin operativ şəkildə işıqlandırılmasına öz töhfəsini verir. Dərc edilən analitik materiallar, araşdırma yazılar, müsahibələr və digər mövzularda bir-birindən maraqlı informasiyalar geniş oxucu kütləsinə çatmağı bacarıb.

Pravda.az-ın əməkdaşı “Konkret.az”ın baş redaktoru Fadil Paşayev ilə həmsöhbət olub.

O, saytın fəaliyyət istiqamətləri, gələcək planlarından danışıb: ““Konkret.az” fəaliyyətə başladığı andan etibarən bir neçə əsas məqsədinə çatıb. Ən birincisi, çalışmışıq ki, operativ və müxtəlif janrda xəbər təqdimatında seçilək. Məncə, buna nail olmuşuq. Portalımız əldə etdiyi məlumatları operativ çatdıra bilib. Bizim bir üstünlüyümüz də analitik yazılarda, reportaj və araşdırmalarda özünü göstərir. Ən sevindirici hallardan biri budur ki, qısa zamanda sayt geniş oxucu kütləsi formalaşdırıb. Saytımız yarandığı gündən söz azadlığı və milli mətbuat ənənələrinin qorunmasına öz töhfələrini verib. Bu illər ərzində uğurlarımız olsa da, qaneedici deyil. Doğrudur, əlimizdən gələni etdik ki, media sahəsində dürüstlüyü, obyektiv informasiyanı çatdıra bilək. Amma çox çətindir. Çünki cəmiyyətin informasiya aclığı ildən-ilə o qədər artır ki, tələbatın qarşılanmasında bəzən geri qalırıq. Amma rəqabət bizi narahat etmir. Çünki bizim öz nəfəsimiz, ictimai rəyin formalaşmasında öz rolumuz var. Bunu danmaq olmaz, demək isə təvazökarlıqdan uzaq olur. Nə edək?! Əsas budur ki, media layihəmiz milli maraqları həmişə öndə tutub. Bəzən sensasion xəbərləri verməkdə tələsməmişik, bəzən də informasiyanı səbirsiz təqdim etmişik. Bu, bir yanaşmadır. Mühüm olan budur ki, əsasən peşəkar komandamız olub. Xüsusən də, prinsipial mövqeyimizi qoruyub-saxlaya bilmişik. Bizi maneələr, çətinliklər qorxutmayıb. Əksinə, daha da güclü edib. Bu gün məhz həmin detallara görə tam əminliklə deyə bilərəm ki, “Konkret.az” təkcə xəbər mənbəyi deyil, həm də güvənilən bir tribunadır. Bunu da xüsusi olaraq vurğulayım ki, 6 yaş artıq məktəb yaşıdır. Deməli, bizi qabaqda daha çətin dərslər və imtahanlar gözləyir. Bəli, çox da böyük olmayan kollektivlə yorulmadan çalışıb mediada bundan sonra da ciddi səy göstərəcəyik. Qarşımızda duran vəzifələrdən biri də daha geniş oxucu auditoriyası qazanmaqdır. Eləcə də bundan sonra da Medianın İnkişafı Agentliyinin müxtəlif layihələrində iştirak etmək, inkişaf perspektivlərini müəyyən etməkdir. 2025-ci ildən bu sahədə mühüm uğurlar əldə edilib. Saytda oxucuların qalması müddətini uzatmışıq. Azərbaycan üzrə SEO optimizasiyasına diqqət yetirmişik. Bütün bunlara rəğmən, son olaraq demək istəyirəm ki, bəli, “Konkret.az” əsas hədəflərinə uğurla nail olub. Operativ xəbər təqdimatı, analtik məzmun, söz və media azadlığını qoruma, müstəqil jurnalistika, geniş oxucu auditoriyası və SEO uğurları bunların təsdiqidir. Əlbəttə, həm portalın rəhbərliyi, həm də media təşkilatları bununla kifayətlənmir. Odur ki, gələcəkdə daha da inkişaf etməyi qarşımıza məqsəd qoymuşuq. Ölkədə media sahəsində vəziyyətdən danışsaq, əsas məqam bundan ibarətdir ki, dövlətin mediaya diqqəti var. Əlbəttə, problemlər də mövcuddur, amma media ilə bağlı müvafiq qurumlar ölkədə islahatları uğurla həyata keçirir. Fürsətdən istifadə edib, Medianın İnkişafı Agentliyinə, onun rəhbərliyinə bununla bağlı öz təşəkkürümü bildirmək istəyirəm”.

“Pravda.az” kollektivi olaraq həmkarlarımızı təbrik edir, fəaliyyətlərində uğurlar arzu edirik!

Aytəkin Qardaşova

Tarix: 2 İyul 2025, 17:59

Xəbər lenti