Prezidentin rütbə verdiyi şəxslər kimdir? - DOSYE

Azərbaycan Prezidenti İlham Əliyevin bu gün imzaladığı sərəncama əsasən, İlham Məmmədova və Seymur Mərdəliyevə birinci dərəcəli fövqəladə və səlahiyyətli elçi, Raman Məmmədovla Nərgiz Səfərova isə ikinci dərəcəli fövqəladə və səlahiyyətli elçi rütbələri verilib. Teleqraf xəbər verir ki, İlham Məmmədov Azərbaycanın Əfqanıstandakı fövqəladə və səlahiyyətli səfiridir.

O, Prezident İlham Əliyevin 28 iyul 2021-ci il tarixli sərəncamı ilə bu vəzifəyə təyin olunub.

Seymur Mərdəliyev isə Azərbaycanın Ukraynadakı fövqəladə və səlahiyyətli səfiridir. O, 1979-cu ildə Bakı şəhərində anadan olub. S.Mərdənliyev Bakı Dövlət Universitetinin Beynəlxalq münasibətlər və beynəlxalq hüquq fakültəsini fərqlənmə diplomu ilə bitirib. Müxtəlif illərdə Xarici İşlər Nazirliyinin Çoxtərəfli humanitar problemlər idarəsinin referenti, Nazirliyin İnsan hüquqları, demokratikləşdirmə və humanitar problemlər idarəsinin attaşesi, Azərbaycanın Cenevrədəki BMT bölməsi və digər beynəlxalq təşkilatlar yanında daimi nümayəndəliyinin attaşesi, üçüncü və ikinci katibi, Azərbaycan Respublikasının İsveçrə Konfederasiyasındakı Səfirliyinin birinci katibi və müşaviri, Xarici İşlər Nazirliyinin Humanitar və sosial məsələlər idarəsinin rəis müavini kimi vəzifələrdə çalışıb.

Ətraflı

Prezident İlham Əliyevin 23 may 2023-cü ildə imzaladığı sərəncama əsasən, Seymur Mərdəliyev Azərbaycanın Ukraynadakı fövqəladə və səlahiyyətli səfiri təyin olunub.

İkinci dərəcəli fövqəladə və səlahiyyətli elçi rütbəsi ilə təltif olunan Raman Məmmədov isə 28 may 1981-ci ildə anadan olub. 1998-2002–ci illərdə Bakı Dövlət Universitetində Hüquqşünaslıq fakültəsində təhsil alıb. 2004-2011-ci illərdə Ekologiya və Təbii Sərvətlər Nazirliyi, 1 saylı Ərazi Ekologiya və Təbii Sərvətlər şöbəsində hüquq məsləhətçisi, baş məsləhətçi, Hüquq sektorunun müdiri, 2011-2012-ci ildə «Aqrolizinq» Açıq Səhmdar Cəmiyyəti Hüquq şöbəsində aparıcı mütəxəssis, 2012-ci ildə "Texno-Atinak" MMC-də hüquqşünas, 2012-ci ilin avqustundan 2015-ci ilədək "Absheron Construction" MMC-də Hüquq və İnsan Resursları şöbəsinin müdiri vəzifələrində çalışıb.

Azərbaycan Respublikası təhsil nazirinin 2015-ci il 28 dekabr tarixli əmri ilə İnsan resursları sektorunun müdiri vəzifəsinə təyin edilmişdir. Hazırda Xarici İşlər Nazirliyində idarə rəisi vəzifəsində çalışır.

Nərgiz Səfərova 2013-cü ildən Bakı Şəhəri üzrə Təhsil İdarəsinin müdir müavini vəzifəsində çalışıb. O, Qərb Universitetinin iqtisadiyyat fakültəsində bakalavriat və magistratura səviyyələri üzrə iqtisadiyyatın hüquqi tənzimlənməsi ixtisasına yiyələnib. Uzun müddət özəl sahədə ixtisası üzrə müxtəlif yüksək vəzifələrdə çalışıb. BŞTİ-nin müdir müavini vəzifəsində maliyyə hesabatlılığı üzrə islahatların aparılması, bu sahədə şəffaflığın artırılması, maliyyə intizamının möhkəmləndirilməsi və innovasiyaların tətbiqi məsələlərinə cavabdeh olub. Daha sonra dövrün təhsil naziri Ceyhun Bayramovun müvafiq əmrinə əsasən o, Təhsil Nazirliyinin Təhsilin iqtisadiyyatı və statistika şöbəsinin müdiri vəzifəsinə təyin edilmişdi.

Nərgiz Səfərova isə 2020-ci ildə Xarici İşlər Nazirliyində maliyyə şöbəsinə müdir vəzifəsinə təyin olunub.

Tarix: 8 İyul 2025, 19:38

Xəbər lenti