Məlhəm Beynəlxalq Hospitalın həkimi pasiyentin şikayəti ilə bağlı məsələyə aydınlıq gətirdi

Məlhəm Beynəlxalq Hospitalın pediatr-nevroloqu Sahilə Ələkbərovanın qəbuluna gələn pasiyenti iki saatdan çox gözlətməsi etirazla qarşılanıb.

Pravda.az xəbər verir ki, bu barədə sosial şəbəkədə Səhiyyə Nazirliyinə müraciətlə şikayət paylaşan pasiyent bildirib ki, o, əkiz övladları ilə 22 iyul səhər saat 09:30-a Sahilə Ələkbərovanın qəbuluna yazılıb.

“Saat 09:15-də ödənişi etdim və gözləmə otağına keçdim. 45 dəqiqə keçdi, hələ həkimdən səs yox idi. Yazdım ki, biz buradayıq, sizi gözləyirik. Cavab: “Yoldayam”. Heç bir üzr, izah, hörmət yoxdur. Dedim ki, yaxşı, biraz da gözləyək. 1 saat keçdi, nə yazdı, nə cavab verdi, zəng etdikdə də cavab vermədi. Qeydiyyat şöbəsinə yaxınlaşdım, şikayətim olduğunu və pulumu geri istədiyimi bildirdim. Dedilər ki, 2-ci mərtəbəyə qalxın. Qalxdım, şikayət otağında da işçi hələ gəlməmişdi. Soruşuram ki, iş saatı nə vaxt başlayır? Cavab: “Bilmirik, birazdan gələr”. Dedim ki, şikayət üçün də əlavə 2 saat gözləməliyəm? İki körpə uşaqla? Bu anda müdir müavini yaxınlaşdı, haqlı olduğumu bildirdi və dedi ki, həkim vaxt təyin edibsə, vaxtında gəlməlidir, sizi yönləndirirəm, pulunuzu geri alın. Amma nə baş verdi? 2 saat keçəndən sonra eyni şəxs yaxınlaşıb dedi ki, həkimlə danışdıq, 20 dəqiqəyə gələcək, gözləyə bilmirsinizsə, pulu qaytaraq. Bura özəl, “beynəlxalq” adını daşıyan klinikadır! İki saatdan çox gözləmək, üzr istəməyən, səbəb göstərməyən bir həkimə görə bu normaldırmı?” – o bildirib.

Pravda.az məsələni aydınlaşdırmaq üçün sözügedən klinikanın pediatr-nevroloqu Sahilə Ələkbərovanın mövqeyini öyrənib.

Həkim açıqlamasında baş verənləri təsdiqləyib: “Mənimlə bağlı çox təcili vəziyyət oldu. Həmin vətəndaş “İnstagram” səhifəsinə yazaraq qəbul istəmişdi. Mən də demişdim ki, gələrsiniz. Həqiqətən, ilk dəfədir, belə hal baş verir. Təcili məsələyə görə gecikdim. Xanım mənə “İnstagram”da təkrar mesaj yazıb, cavab ala bilməyib. Bəzən “İnstagram” mesajları unudula bilir. Pasiyentlərin mesajlarını özüm cavablandırıram. Bunun üçün ayrıca tibb işçisi yoxdur ki, pasiyentləri yönləndirsin, səhifəyə yerləşdirilən öz nömrəmdir. Digər pasiyentlərə “Whatsapp” üzərindən məlumat verilib. “İnstagram”ı isə səhər təcili vəziyyətdə görə bilməmişəm. Doğrudan da, pasiyent gəlib, hospitalda gözləyib. Dedim ki, vəziyyət belədir, gözləyə bilmirsinizsə, ödənişi geri qaytarsınlar, başqa vaxt gələrsiniz. Bizim klinikada belə bir şey yoxdur ki, həkim pasiyentə baxmadığı təqdirdə ödəniş geri qaytarılmasın. Xanımın ödənişi özünə qaytarılıb. Mən klinikaya gələndə isə artıq onlar getmişdilər”.

Aytəkin Qardaşova

Tarix: 24 İyul 2025, 14:05

Xəbər lenti