BURADA REKLAMINIZ OLA
BİLƏR

Mağaza sahibini və qayınanasını döyən şəxs məhkəmə zalından həbs edildi

Ağstafa Rayon Məhkəməsində xuliqanlıqda təqsirləndirilən Fərəc Əmirovun (adı, soyadı şərtidir) cinayət işi üzrə məhkəmə istintaqı başa çatıb.


Pravda.az-ın əldə etdiyi məlumata görə, hakim Heyran Mürsəlovanın sədrliyi ilə keçirilən prosesdə hökm oxunub.


Hökmə əsasən, o, 2 il 6 ay müddətə azadlıqdan edilib və təqsirləndirilən şəxs məhkəmə iclas zalından dərhal həbs olunub.


İttiham aktına görə, hadisə 20 may 2025-ci il tarixdə, saat 13:20 radələrində Ağstafa şəhərində yerləşən “Zəhra Telekom” mobil telefon aksessuarları mağazasının qarşısında qeydə alınıb.


Belə ki, Fərəc Əmirov zərərçəkmiş Sənan Nəbiyev (adı, soyadı şərtidir) tərəfindən idarə olunan sözügedən mağazaya gəlib. O, heç bir əsaslı səbəb olmadan və hər hansı şəxs tərəfindən ona müraciət edilmədiyi halda, ona guya Sənanın mərhum tanışı S.K-nın (adı, soyadı şərtidir) həyat yoldaşının mobil telefon vasitəsilə qadına sevgi münasibəti təklif etdiyini deyib. Fərəc bunu bəhanə edərək orada olan şəxslərin gözü qarşısında Sənanı nalayiq ifadələrlə təhqir edib. Daha sonra o, zərərçəkmişin sifət nahiyəsinə yumruqla bir dəfə vurub. Zərbədən sonra Sənanın ondan qaçmağa cəhd göstərməsinə və ətrafdakı şəxslərin vəziyyəti sakitləşdirməyə çalışmasına baxmayaraq, onu təqib edib, bədəninin müxtəlif hissələrinə yenidən yumruq zərbələri endirib.


Təqsirləndirilən şəxs xuliqanlıq hərəkətlərini davam etdirib. Bu zaman mağazanın qarşısında, səki üzərində satış üçün düzülmüş çəhrayı rəngli uşaq skuterindən silah qismində istifadə edərək həmin skuter ilə Sənan tərəfə zərbə endirib. Skuterin zərərçəkmişin qoluna dəyib.
 

Hadisə zamanı ətrafda olan və ictimai qaydanın pozulmasının qarşısını almağa çalışan Sənanın qayınanası, zərərçəkmiş Məxmirə Hacıyeva (adı, soyadı şərtidir) da onun aqressiv hərəkətlərini dayandırmaq məqsədilə araya girib. Lakin Fərəc ona da yumruqla bir neçə dəfə zərbə endirib. Zərbələr nəticəsində Məxmirə Hacıyeva dizləri üstə yerə yıxılıb və sağ bazusunda qançırla müşayiət olunan bədən xəsarətləri alıb.


Hadisədən sonra Fərəc Əmirov saxlanılıb və barəsində başqa yerə getməmək haqqında iltizam qətimkan tədbiri seçilmişdi. 

 

Kamal Məmmədov 

Tarix: 17 Oktyabr 2025, 08:38   
Xəbər lenti
Çox oxunanlar

Ən son xəbərləri səhifəmizdən də izləyin