Qurban bayramı üçün aldıqları heyvanları 15 minə sataraq dələduzluq etdi - QƏRAR

Bakı Apellyasiya Məhkəməsində dələduzluqda təqsirləndirilən Tağı Tağıyevin (adı, soyadı şərtidir) barəsindəki hökmdən dövlət ittihamçısı tərəfindən verilən apellyasiya protesti və apellyasiya şikayəti üzrə məhkəmə iclası yekunlaşıb.

Pravda.az-ın əldə etdiyi məlumata görə, sonuncu keçirilən prosesdə qərar elan olunub.

Qərara əsasən, apellyasiya protesti təmin edilməyib və apellyasiya şikayəti isə qismən təmin olunub, Sabunçu Rayon Məhkəməsinin hökmü cəza təyin edilməsinə dair hissədə dəyişdirilib. Təqsirləndirilən şəxsin 1 il 11 ay 28 gün müddətinə azadlıqdan məhrumetmə cəzası 2 il 2 ay 16 gün müddətə azadlığın məhdudlaşdırılması (elektron qolbaq) cəzası ilə əvəz edilib və o, dərhal məhkəmə iclas zalında həbsdən azad olunub.

İttihama görə, Tağı Tağıyev 2024-cü ilin may ayında zərərçəkmiş Uğur Həmzəyevi (adı, soyadı şərtidir) aldatmaqla onun etibarından sui-istifadə edib, qanunsuz olaraq əmlakını ələ keçirmək məqsədilə dələduzluq əməlləri törədib.

Belə ki, o, Qurban bayramı ərəfəsində zərərçəkmiş şəxsə böyük və kiçik buynuzlu heyvanlar alaraq satmaq və bu yolla birgə qazanc əldə edəcəkləri barədə yalan vədlər verib, onun inamını qazanıb. Təqsirləndirilən şəxs bu məqsədlə Uğurun 15 000 manat dəyərində aldığı 50 baş xırda buynuzlu heyvanı “Salyan bazarı” deyilən ərazidə satacağını bildirib. Zərərçəkmiş şəxs etibarını möhkəmləndirmək məqsədilə heyvanları təqsirləndirilən şəxsə verib və onların Bakı şəhərinə göndərilməsinə razılıq göstərib. Lakin bir həftə sonra Tağı həmin 50 baş heyvanı cinayətdən xəbəri olmayan həmyerlisinin idarə etdiyi “Qazel” markalı avtomobillə Salyan bazarına apararaq satıb və əldə etdiyi 15 000 manat məbləğində pulu ələ keçirib.

Bundan əlavə, o, 2024-cü ilin may ayının sonlarında da eyni üsulla zərərçəkmiş şəxsi aldadaraq birgə qazanc əldə edəcəkləri vədi ilə onun 10 000 manat nağd pulunu ələ keçirib. Bu hadisə Bakı şəhəri, Sabunçu rayonu, Maştağa qəsəbəsində, “Qalatasaray” kafesinin qarşısında baş verib.

Beləliklə, təqsirləndirilən şəxs ümumilikdə 25 000 manat məbləğində, yəni xeyli miqdarda maddi ziyan vurmaqla dələduzluq edib.

Birinci instansiya məhkəməsi toplanmış sübutları qiymətləndirərək belə qənaətə gəlib ki, pul vəsaitləri ayrı-ayrı vaxtlarda alınsa da, Tağı Tağıyevin hərəkətləri vahid niyyətlə əhatə olunub və bir ümumi məqsədə xidmət edib. Bu səbəbdən, onun əməlləri davam edən cinayət kimi qiymətləndirilib və təqsirləndirilən şəxsə qarşı irəli sürülmüş ittihamdan CM-nin 178.2.2-ci maddəsi xaric edilib.

Kamal abdulla

Tarix: 21 Oktyabr 2025, 09:08

Xəbər lenti