Atasını öldürən yeniyetmənin anası və qardaşı barədə QƏRAR

Şəki Apellyasiya Məhkəməsində cinayət barəsində xəbər verməmə və ya qabaqcadan vəd etmədən cinayəti gizlətmədə təqsirləndirilən Arzu Bayramova və oğlu İlyas Bayramovun barəsindəki hökmdən verilən apellyasiya şikayəti üzrə məhkəmə prosesi başa çatıb.

Pravda.az-ın əldə etdiyi məlumata görə, sonuncu keçirilən prosesdə qərar elan edilib.

Qərara əsasən, apellyasiya şikayəti təmin edilməyib.

İttihama görə, hadisə 22 dekabr 2023-cü il tarixdə saat 16-17 radələrində Balakən rayonu ərazisində qeydə alınıb.

Belə ki, C.Bayramov atası, 1975-ci il təvəllüdlü Qəhrəman Bayramovu ailə münaqişəsi zəminində balta ilə vuraraq öldürüb.

Daha sonra C.Bayramov saxlanılıb.

Onun barəsində Cinayət Məcəlləsinin 120.1-ci (qəsdən adam öldürmə) maddəsi ilə ittiham irəli sürülüb.

C.Bayramov məhkəmə ifadəsində bildirib ki, hadisə zamanı atasının əlinə bıçaq götürüb anasının boğazına dirədiyini görüb. Atasının anasını öldürəcəyindən qorxaraq qonaq otağına qoyduğu baltanı götürüb anasını xilas eləmək üçün Qəhrəman Bayramova arxa tərəfdən yaxınlaşıb onun başının arxasından vuraraq qətlə yetirib.

Şəki Ağır Cinayətlər Məhkəməsinin hökmü o, 7 il 6 ay müddətinə azadlıqdan məhrum edilib.

Sonradan C.Bayramovun qardaşı və anası da həbs edilib. Onlar cinayət barəsində xəbər verməmə və ya qabaqcadan vəd etmədən cinayəti gizlətmədə təqsirli biliniblər.

Məlumata görə, C.Bayramov atasını öldürəndən sonra polisə təslim olmaq istəyib. Lakin anası Arzu Bayramova buna icazə verməyib. Qadın oğluna təslim olacağı halda, özünü öldürəcəyini deyib. Bundan sonra ana iki oğlu ilə birlikdə meyiti gizlətməyə çalışıb.

Onlar meyiti əvvəlcə qara sellofan torbaya keçirərək ədyala büküblər. Qana bulaşmış əşyaları qara sellofan torbaya yığıblar. Əlcəklərdən və yuyucu vasitələrdən istifadə edərək qana bulaşmış yerləri siliblər. Baltanı da yuyaraq tiyəsini eyvanda gizlədiblər. Meyiti maşına qoyaraq Balakən rayonu ərazisində bir neçə dəqiqə gəziblər. Onlar meyiti gizlətmək üçün yer axtarıblar. Lakin tapmadıqda evə qayıdıblar. Evə gəldikdən sonra bir neçə saat dincəliblər. Qərara gəliblər ki, meyiti Mazımçay çayının Balakən rayonu İsaxlıgirmə kəndi ərazisindən keçən hissəsində yerləşən körpüdən atsınlar. Bu məqsədlə evdən çıxıblar. Meyiti bükdükləri ədyalı və sellofanları çıxarıb körpüdən çaya atıblar. Digər əşyaları isə başqa bir ərazidə gizlədiblər.

Balakən Rayon Məhkəməsinin hökmü ilə Arzu Bayramova ilə oğlu İlyas Bayramovun hər biri 2 il müddətinə azadlıqdan məhrum ediliblər və onlar məhkəmə zalında həbs olunublar.

Kamal Məmmədov

Tarix: 31 Oktyabr 2025, 09:08

Xəbər lenti