“Ermənistanın çıxış yolu yoxdur” – Deputat

"Prezident İlham Əliyevin Dağlıq Qarabağ münaqişə ilə bağlı tutduğu mövqeyi dəstəkləyirəm və ordumuzun Tovuz istiqamətində düşmənə layiqli cavab verməklə yanaşı, bu məsələdə beynəlxalq səviyyədə də Azərbaycana dəstəyin nümayiş olunmasını ölkəmizin baris qələbəsi kimi dəyərləndirirəm".

Bu sözləri Milli Məclisin İntizam Komissiyasının sədri, Aqrar siyasət komitəsinin və Yeni Azərbaycan Partiyasının (YAP) İdarə Heyətinin üzvü olan deputat Eldar İbrahimov deyib.

Həmçinin o bildirib ki, ölkədə pandemiya dövründə də sosial layihələrin tam icra edilməsi, əhalinin sosial rifah halının diqqətdə saxlanılması, ölkə iqtisadiyyatının pandemiya dövründə stabil saxlanılması bir daha Azərbaycandakı inkişaf tendensiyasından xəbər verir:

"Azərbaycan Prezidenti İlham Əliyev son çıxışlarında ölkədə bu istiqamətdə görülən işlərdən danışmış və 2020-ci ilin I rübünün yekunlarına dair iclasda da bu meyarlara toxunmuşdur. Həmçinin, ölkə Prezidenti Bakıda şəhid ailələrinə, müharibə əlillərinə mənzillərin və avtomobillərin təqdim olunması mərasimində də iştirak etməsi də məhz ölkə rəhbərinin vətəndaşlara qayğısından və diqqətindən xəbər verir. Burada Prezident Azərbaycan Respublikası Ordusunun Ermənistanın təxribatlarına layiqincə qarşılıq verdiyini də bildirmişdir. Həmçinin hərbi qələbəmizi qeyd etmək üçün küçələrə çıxan minlərlə insanın dövlətə, orduya dəstəyindən danışmışdır. Lakin bu gözəl mənzərəyə, vətəndaş həmrəyliyinə kölgə salaraq bir qrup şəxsin ixtişaş yaratmaq məqsədilə Parlament binasına daxil olmasını bəzi çirkin ünsürlərin vəziyyətdən istifadəsi kimi dəyərləndirmişdir".

Parlament binasında edilən dağıntılardan danışarkən Erldar İbrahimov bildirib ki, Milli Məclis binasını dağıntılara məruz qoyan, onları Parlament binasına yönləndirən şəxslərin, yəni, "5-ci kolon" nümayəndələrinin kimliyinin müəyyənləşdirilməsi istiqamətində istintaq aparılır:

"Həmin gün yürüş edən vətəndaşlarımız dövlətə və Azərbaycan Osdusuna dəstəklərini nümayiş etdirmək məqsədində idilər, lakin, onları necəsə Milli Məclisə yönləndirdilər. Hətta Parlament binasının üçüncü mərtəbəsinə qədər dağıntılar törədilmişdi. Mən özüm də dağıntılara şahid oldum. Buna ehtiyac yox idi".

Millət vəkili qeyd edib ki, Prezident İlham Əliyev bu günə qədər bütün beynəlxalq təşkilatlarla özü şəxsən Dağlıq Qarabağ məsələsinin həlli istiqamətində danışıqlar aparıb, həmçinin, ölkə rəhbərinin təşəbbüsü ilə aparılan videokonfranslar da Azərbaycanın nüfuzunun qaldırılmasına xidmət edib: "Tovuz hadisələrində də bütün beynəlxalq təşkilatlar, həmçinin Müstəqil Dövlətlər Birliyinin (MDB), Təhlükəsizlik Şurasının üzvü olan dövlətlər də bu münaqişədə Azərbaycanı dəstəklədi. Bütün bunlar Prezident İlham Əliyevin Dağlıq Qarabağ münaqişəsinin həll olunması yolunda gördüyü işlərin nəticəsidir. Təbii ki, Ermənistan tərəfi və Nikol Paşinyan kimi rəhbərlər məslənin həll olunması istiqamətində problem yaratmağa çalışırlar. Lakin, artıq Ermənistanın çıxış yolu yoxdur. Bu məsələ həll olunmalıdır".Sia

Tarix: 23 İyul 2020, 10:00

Xəbər lenti