Qadını aldadan mebel ustasına elektron qolbaq taxıldı

Xəzər Rayon Məhkəməsində dələduzluqda təqsirləndirilən Nağı Həsənovun (adı, soyadı şərtidir) cinayət işi üzrə məhkəmə istintaqı yekunlaşıb.

Pravda.az-ın əldə etdiyi məlumata görə, hakim Toğrul Məmmədovun sədrliyi ilə keçirilən prosesdə hökm oxunub.

Məhkəmənin hökmü ilə o, 1 il 3 ay 22 gün müddətinə azadlığın məhdudlaşdırılması (elektron qolbaq) cəzası təyin edilib.

İttihama görə, Nağı Həsənov tamah niyyəti ilə, aldatma və etibardan sui-istifadə etmə yolu ilə özgənin əmlakını ələ keçirmək məqsədilə heç bir yerdə işləmədiyi halda özünü “Stil Mebel” şirkətinin sahibi kimi təqdim edib. O, “Instagram” sosial şəbəkəsində mebel sifarişləri qəbul etməsi ilə bağlı elan yerləşdirib və 2024-cü ilin iyul ayında həmin elan vasitəsilə telefonla əlaqə saxlayan zərərçəkmiş Maya Hacılı (adı, soyad şərtdir) ilə tanış olub.

Təqsirləndirilən şəxs görüş zamanı özünü işgüzar və peşəkar şəxs kimi göstərmək məqsədilə zərərçəkmiş şəxsi Bakı şəhəri, Sabunçu rayonu, Bakıxanov qəsəbəsində yerləşən, əvvəlcədən tanıdığı şəxsə məxsus mebel istehsalı sexinə aparıb, obyetin bir hissəsinin ona məxsus olduğunu yalan bildirib, oradakı mebel istehsalı üçün lazım olan materialları göstərərək qadının etibarını qazanıb. O, zərərçəkmiş şəxsin verdiyi 3 200 manat məbləğində pul müqabilində 10 gün müddətində mətbəx mebeli hazırlayacağına dair yalan vədlər verib.

Daha sonra 03 iyul 2024-cü il tarixdə saat 15:00 radələrində Mayanın Bakı şəhəri, Xəzər rayonu, Şüvəlan qəsəbəsində yerləşən bağ evinə gedərək mətbəx mebelinin ölçülərini götürüb, sifarişi qəbul etdiyini bildirib, həmin gün isə mebelin hazırlanmasına başlanılması adı ilə zərərçəkmiş şəxsdən 2 000 manat məbləğində beh alıb. Lakin o, verdiyi vədlərə əməl etməyib, aldığı pul vəsaitini şəxsi ehtiyaclarına sərf edib.

Beləliklə, Nağı Həsənov aldatma və etibardan sui-istifadə etmə yolu ilə zərərçəkmiş şəxsə 2 000 manat məbləğində maddi ziyan vuraraq dələduzluq edib.

Məhkəmə iclasında Nağı Həsənov özünü ittiham olunduğu əməlin törədilməsində təqsirli bilməyib. O, 3 iyul 2024-cü il tarixdə mebel sifarişi götürdüyünü, lakin ailə vəziyyəti ilə əlaqədar mebeli vaxtında hazırlaya bilmədiyini söyləyib. Buna görə də ona bəraət verilməsini xahiş edib.

Məhkəmə istintaqı zamanı ifadəsi elan edilmiş təqsirləndirilən şəxs ibtidai istintaq zamanı verdiyi ifadəsində ona elan edilmiş ittiham üzrə özünü təqsirli bilib. Nağı dindirilərkən deyib ki, atası ağır yataq xəstəsidir. Ondan başqa bir qardaşı və iki bacısı vardır. Özü fərdi qaydada mebel ustası kimi fəaliyyət göstərir.

Kamal Məmmədov

Tarix: 17 Noyabr 2025, 08:31

Xəbər lenti