Əli Həsənov danışdı: “Həyat yoldaşım Ramiz Mehdiyevin arvadı ilə...”

Qaçqınların və Məcburi Köçkünlərin İşləri üzrə Dövlət Komitəsinin sabiq sədri, YAP Ağsaqqallar Şurasının üzvü Əli Həsənov Xural TV-nin rəhbəri Əvəz Zeynallının onun həyat yoldaşının erməni dilində danışdığı və Prezident Administrasiyasının keçmiş rəhbəri Ramiz Mehdiyevin erməni əsilli arvadı ilə Mehdiyev vəzifədə olarkən vaxtaşırı Badamdardakı villada görüşlər keçirdiyi, görüşlərdə erməni dilində danışdıqları, ermənilərlə qohum olan şəxslərin vəzifələrə irəli çəkilməsi istiqamətində iş apardıqları haqda dediklərinə cavab verib. Təkzibini əlyazma formasında Musavat.com-a göndərən Əli Həsənov qeyd edib ki, Əvəz Zeynallının dedikləri onun ailəsinə qarşı şər-böhtandır:

“Xural TV-nin rəhbəri Əvəz Zeynallı Ramiz Mehdiyevdən danışarkən mənim ailəmin guya Ramiz Mehdiyevin ailəsi ilə erməni dilində danışdığını deyir və guya Badamdarda villa tikintisində işləyən fəhlənin ona dediklərinə istinad edir. Sonra deyir ki, bilmirəm o fəhlə sağdı, ya ölüb və hətta həmin fəhləyə təşəkkür edir. Əvvəla, mənim ailəm Ramiz Mehdiyevin ailəsinin heç üzünü də görməyib və erməni dilində bir söz də bilmir. Mənim Badamdarda heç bir villam yoxdur. Ailəm isə Qarabağlıdır-Ağcabədidə dünyaya göz açıb. Əvəz Zeynallının dedikləri ifrat dərəcədə şər və böhtandır. O birinci dəfə deyil mənim ünvanıma şər-böhtan danışır. Özü də sifarişlə”.

22 il Qaçqınların və Məcburi Köçkünlərin İşləri üzrə Dövlət Komitəsinin sədri olaraq məcburi köçkünlərin problemləri ilə məşğul olduğunu vurğulayan Əli Həsənov daha sonra deyib:

“Ulu Öndər Heydər Əliyevin və möhtərəm Prezidentimiz İlham Əliyevin qərar və tapşırıqlarını, onların mənə verdikləri geniş səlahiyyətlərdən istifadə edərək qaçqın və məcburi köçkünlər arasında ictimai-siyasi sabitliyin qorunub-saxlanması üçün lazımi tədbirlər görmüşəm. Həmin dövrdə mənim ünvanıma mətbuatda çoxsaylı şər-böhtanlar yazılıb. Mən heç birinə cavab verməmişəm, çünki bilirdim ki, bu yazılar sifarişlə yazılır və qaçqın və məcburi köçkünlər arasında ictimai-siyasi sabitliyin pozulmasına yönəlib. Hər dəfə mənə qarşı böhtanlar yazıldıqca, mən əksinə qeyd etdiyim istiqamətdə gördüyüm tədbirləri daha da gücləndirirdim. İndi Əvəz Zeynallının danışığına ona görə cavab verirəm ki, o, mənim ailəm barədə ağlasığmaz dərəcədə şər-böhtan danışıb, özü də hədəfi yayındırmaq üçün. Ailə müsəlman aləmində hər bir kişi üçün müqəddəsdir. Başqasının ailəsinə qarşı şər-böhtan danışmaq heç kimə başucalığı gətirmir və bu, yolverilməzdir, heç bir çərçivəyə sığmır”.

Tarix: 17 Noyabr 2025, 13:48

Xəbər lenti