Memar: “Ağıllı şəhər” insanların tənbəlləşməsinə gətirib çıxaracaq”

Dövlət Şəhərsalma və Arxitektura Komitəsinin sədri, WUF13-ün milli koordinatoru Anar Quliyevin "Azərbaycan artıq uzun müddətdir ki, şəhərsalma sahəsində ciddi islahatlar həyata keçirir" fikirləri müzakirə yaradıb. Son dövlər paytaxt ərazisində səkilərin zəbt olunması, qanunsuz tikililər fonunda A.Quliyev tənqid edilib.

Pravda.az müzakirələrlə bağlı tanınmış memar Abdul Hüseynovun fikirlərini öyrənib.

O, Anar Quliyevin "ağıllı şəhər" layihəsi barədə dediklərinə diqqət çəkib: “Anar müəllim, yəqin ki, "şəhərsalma sahəsində islahatlar" deyəndə Qarabağ zonasında aparılan tikinti prosesini nəzərdə tutur. Bakıda sanki hansısa qarşıdurma baş verir. Əvvəlcə, mərkəzi küçələrə - Nizami və digər küçələrə, Fəvvarələr meydanına və s. baxaq... Bir il əvvəl kütləvi informasiya vasitələrində məlumatlar yayılmışdı ki, səkilər zəbt olunub, restoran, kafe tikilir, sonra Dövlət Şəhərsalma və Arxitektura Komitəsi prosesi dayandırıb. Belə çıxır ki, icra hakimiyyəti yenə tikintiyə icazə verir, hansısa qarşıdurma var. Yəni bu, özbaşına proses deyil. Əgər belədirsə, onda nəzarətdən çıxıb. Anar Quliyev deyir ki, insan mərkəzli, "ağıllı şəhər" üzrə qaydalar hazırlamaq təşəbbüsü irəli sürülüb. Aktual mövzudur. Bir memar kimi demək istəyirəm, "ağıllı şəhər"lər layihəsinin arxasınca gedəndə yaddan çıxarmayaq ki, "ağıllı şəhər"lərdən əvvəl tarixi şəhərlərimizi və tarixi mərkəzlərimizi itirməyək. Bundan sonra "ağıllı şəhər" barədə düşünmək olar. "Ağıllı şəhər" təkcə kameraların çoxluğu demək deyil. Məsələ "ağıllı şəhər" terminini necə qəbul etməyimizdədir. Məsələn, hansısa tullantıların qablaşdırılması və s. prosesin bir hissəsi, elementidir. Abşeronun bəzi rayonlarında heç kanalizasiya sistemi də yoxdur. Bunu açıq demək lazımdır. Yəqin ki, kommunikasiya problemləri həll olunmalıdır, bundan sonra hansısa “ağıllı şəhər” barədə düşünmək olar. Prinsiplərin olması yaxşıdır, sadəcə, bu prinsiplər Azərbaycan reallıqlarına uyğun olmalıdır. Adi tullantıların çeşidlənməsinə fikir verirəm, insanlar qaydalara əməl etmirlər. Bunu “ağıllı şəhər”in faydalı bir hissəsi kimi qəbul edirik. Buna görə də prinsiplərin nəyə əsasən seçiləcəyini dəqiqləşdirmək lazımdır. Bəzi məqamlarda həddindən artıq "ağıllı şəhər"lərin çoxluğu insanların deqradasiyasına gətirib çıxara bilər. Yəni hər şey çox rahat, əlçatandır. "Ağıllı şəhər"siz də vacib olan məsələlərdən danışmıram. Məsələn, səkilərin sıfır səviyyəsində olması, əlçatanlıq, əlillər üçün hansı formada olmalıdır - bunalardan danışmıram. Bunlar "ağıllı şəhər" olmadan da vacib olan normativlərdir. Demək istəyirəm ki, "ağıllı şəhər" insanların tənbəlləşməsinə gətirib çıxaracaq. İnsanların sosial vəziyyəti, güzəranı bununla paralel getməlidir. Şəhəri həddindən artıq "ağıllı" etdiniz, amma həm sosial, həm də iqtisadi baxımdan o qədər də yaxşı şəraitdə yaşamayan insanlar var. Elə olsun ki, disonansa gətirib çıxarmasın. Ümumi orta statistik harmoniya olmalıdır. Texnologiyanın çoxluğundan istifadə etmək o demək deyil ki, insanların güzəranı normal vəziyyətdə olacaq, yoxsulluq azalacaq. Yaxud ölkədən gənc mütəxəssislərin çıxıb getməsi... Kənardan deyə bilərsiniz ki, bunların prosesə nə aidiyyatı var? Müəyyən dərəcədə bir-biri ilə bağlı proseslərdir”.

Aytəkin Qardaşova

Tarix: 18 Noyabr 2025, 10:52

Xəbər lenti