Deputat 192 manat ödənişdən danışdı: “Bu, insanların sağlamlıqlarında problem olanda həmin vəsait hesabına yararlana bilməsi üçündür”

“Bildiyiniz kimi, "Tibbi sığorta haqqında" qanuna 2025-ci ilin mart ayında edilən yeni dəyişikliklərə əsasən, işləməyən vətəndaşlar icbari tibbi sığortadan istifadə etmək üçün hər ay vəsait ödəməli olacaqlar. İcbari tibbi sığorta sığorta növlərindən biridir. İnsanlar avtomobillərini, evlərini də sığortalayırlar. Eyni zamanda öz sağlamlıqlarını sığortalamaq üçün müəyyən vəsait ödəyirlər ki, sonradan sağlamlıqlarında problem olanda köçürdükləri vəsait hesabına yararlana bilsinlər. Yəni insanların sağlamlığı üçün bunun əhəmiyyəti var. Son dövrlər icbari tibbi sığortanın nə qədər böyük əhəmiyyət kəsb etdiyini hamı görür. Verilən son məlumata görə, daha səkkiz xəstəlik növü də icbari sığorta paketinə daxil edilib”.

Bu sözləri Pravda.az-a açıqlamasında Milli Məclisin Əmək və sosial siyasət komitəsinin sədr müavini Elşad Musayev deyib.

“Qanuna dəyişiklik edilən zaman bu məsələ xeyli müzakirə olundu. Hökumət nümayəndələrinə də suallar verildi. Onların arqumenti bundan ibarət oldu ki, müəyyən qisim insanlar kənd təsərrüfatı ilə məşğuldurlar, məhsul satırlar və pul qazanırlar. Amma vergidə qeydiyyatda olmadıqları üçün kənarda qalırlar. Onlar da vəsait ödəməlidirlər. Çünki əks halda ictimai balans pozulur. Qanuna dəyişiklik edilən zaman bunun lehinə və əleyhinə səs verənlər, həmçinin bitərəf qalanlar oldu. Nəticə etibarilə, yekunda qanuna əlavə dəyişiklik edildi. Cəmiyyətimizi maraqlandıran sual budur ki, işləməyən şəxslər nə qədər vəsait verməlidirlər? Yaxud pulları yoxdursa, necə olacaq? Vəsait ödəmədikləri üçün cərimə olunacaqlarmı? Sığortaya işləyənlər və işləməyənlər üçün 16 manat ödəniş edilməsi nəzərdə tutulub. Azərbaycanda minimum əməkhaqqı 400 manatdır. Bunun dörd misli nəzərdə tutulur. Aylıq 16 manat ildə 192 manat edir. Bu vəsaiti ödəyənlər icbari tibbi sığortadan istifadə etmək hüququ qazanacaqlar. Yeni qanuna görə, vəsaiti ödəməyənlər bu sığortadan istifadə etmək hüququ qazanmırlar. Hər hansı cərimə tətbiqi isə nəzərdə tutulmur. İcbari Tibbi Sığorta Agentliyinə tapşırılıb ki, bununla bağlı konkret qaydalar hazırlasın. Qaydalarda hər şey dəqiq göstəriləcək. Pensiyaçılar, əlilliyi olan şəxslər, uşaqlar icbari tibbi sığortadan istifadə edirlər. Mənim mövqeyim bundan ibarətdir ki, gələcəkdə onkoloji xəstələr və xəstəliklər də icbari sığorta paketinə daxil edilsin. Qanuna yeni dəyişikliklər ediləndə müzakirə yox idi, indi isə müzakirə açılıb. Hər halda zamanla görəcəyik ki, dəyişiklik özünü necə göstərir. Bundan sonra konkret fikir söyləmək olar", - deputat bildirib.

Aytəkin Qardaşova

Tarix: 26 Noyabr 2025, 11:57

Xəbər lenti