Bakıda vətəndaşlara 206 minlik dələduzluq edən şəxslə bağlı qərar dəyişdi

Ali Məhkəmədə dələduzluqda və sənədləri saxtalaşdırmada təqsirləndirilən Elnur Heydərovun barəsindəki qərardan verilən kassasiya şirkəti üzrə məhkəmə iclası başa çatıb.

Pravda.az-ın əldə etdiyi məlumata görə, hakim İlkin Rəcəbovun sədrliyi ilə keçirilən prosesdə qərar elan olunub.

Qərara əsasən, kassasiya şikayəti qismən təmin edilib, Bakı Ağır Cinayətlər Məhkəməsinin hökmü və Bakı Apellyasiya Məhkəməsinin qərarı dəyişdirilib, onun təqsirli bilindiyi Azərbaycan Respublikası Cinayət Məcəlləsinin 320.1-ci (Hüquq verən və ya vəzifədən azad edən vəsiqəni və ya digər rəsmi sənədi istifadə etmək məqsədi ilə saxtalaşdırma və ya qanunsuz hazırlama, yaxud bu cür sənədi satma, habelə eyni məqsədlə Azərbaycan Respublikasının saxta dövlət təltifini, ştampı, möhürü, blankı hazırlama və ya satma) maddəsi ilə cinayət məsuliyyətinə cəlbetmə müddəti keçdiyinə görə o, cəzadan azad olunub, cinayətlərin məcmusu üzrə cəzaların təyin edilməsinə dair müddəalar xaric edilib. Onun 6 il 6 ay müddətə azadlıqdan məhrumetmə cəzası saxlanılıb.

İttihama görə, Elnur Heydərov müxtəlif şəxsləri aldatmaq yolu ilə onların etibarından sui-istifadə edərək ümumilikdə böyük məbləğdə pul vəsaitini ələ keçirib.

Məlumata əsasən, o, əvvəlcə zərərçəkmiş K.K.-ni (adı, soyadı şərtidir) paytaxtın Teymur Əliyev adına sanatoriyaya bitişik tikilini özəlləşdirəcəyinə inandıraraq 2022-ci il may–dekabr ayları ərzində müxtəlif tarixlərdə ümumilikdə 112 600 manat məbləğində pul alıb və vədinə əməl etməyib.

Həmçinin təqsirləndirilən şəxs 2023-cü ilin mart ayında zərərçəkmiş V.V.-ni (adı, soyadı şərtidir) Bakı şəhəri, Yasamal rayonunda yerləşən fərdi yaşayış evinə çıxarış almaq adı ilə yaxınlaşaraq iki mərhələdə ümumilikdə 4 000 manat vəsaiti ələ keçirib.

İttiham aktında göstərilib ki, Elnur 2023-cü il aprelin 18-də zərərçəkmiş A.A.nı (adı, soyadı şərtidir) da eyni üsulla aldadaraq Binəqədi rayonunda yerləşən evə çıxarış almaq adı ilə 1 100 manat pul alıb qaytarmayıb.

Bundan başqa, məhkum hüquq verən rəsmi sənədi saxtalaşdırmaqla zərərçəkmiş N.N.-i (adı, soyadı şərtidir) QSC-lərdən birinə məxsus qeyri-yaşayış sahəsini onun adına özəlləşdirəcəyinə inandırıb. O, 28 aprel 2023-cü ildə 80 000 manat məbləğində vəsaiti alaraq mənimsəyib.

İttihamda həmçinin qeyd olunub ki, 2023-cü ilin iyulunda zərərçəkmiş Y.Y.-i (adı, soyadı şərtidir) Səngəçal qəsəbəsində yerləşən bağ evinə çıxarış alacağı adı ilə 5 600 manat pul verdirərək dələduzluq edib.

Son olaraq, o, 2023-cü ilin avqustunda zərərçəkmiş M.M.-i (adı, soyadı şərtidir) həyat yoldaşının ləğv edilmiş Azərbaycan Beynəlxalq Universitetinin diplomunu ala biləcəyinə inandıraraq 2 800 manat məbləğini ələ keçirib.

Beləliklə, Elnur Heydərov həmin şəxslərə qarşı ümumilikdə 206 100 manatlıq dələduzluq edib.

Kamal Məmmədov

Tarix: 2 Dekabr 2025, 08:53

Xəbər lenti