Vahid Məhərrəmli: “Kənd təsərrüfatına yararlı torpaqlarda müvəqqəti və ya daimi tikinti işlərinin aparılmasını qadağan etmək lazımdır”

Məlum olduğu kimi, kənd təsərrüfatı təyinatlı torpaqlarda inşa ediləcək tikililərin standartları təyin edilib. Belə ki, 2026-cı ilin yanvar ayının 1-dən etibarən kənd təsərrüfatı təyinatlı torpaqlarda tövlə, çoban evləri, texnika və məhsul anbarları tikmək istəyən şəxslər lazımi sənədlərlə yerli icra hakimiyyətinə müraciət etməlidirlər. Hər şey qaydasındadırsa, bundan sonra fermerlər Dövlət Şəhərsalma və Arxitektura Komitəsinə müraciət etməlidirlər. Təyin edilən standartlardan kənar tikililərin inşası isə qadağan ediləcək. Yeni qaydalarla bağlı müzakirələr fonunda bildirilir ki, bu, yerli icra orqanlarının sui-istifadə hallarına yol açacaq, kəndlinin təsərrüfatını inkişaf etdirməsinin qarşısını alacaq.

Kənd təsərrüfatı üzrə ekspert Vahid Məhərrəmli isə Pravda.az-a açıqlamasında deyib ki, əslində qaydalara hər hansı dəyişiklik olmayıb.

Ekspertin sözlərinə görə, əvvəllər də müvəqqəti tikiliyə yerli icra orqanları icazə verib: “Müvəqqəti tikili nədir? Yəni müəyyən bir müddətlik tikilib. Torpaq islahatı aparılandan sonra heç kim heç vaxt heç yerdə yerli icra orqanlarının nümayəndələrinin icazəsi olmadan hər hansı müvəqqəti tikili həyata keçirməyib. Əvvəllər polis, sonra yerli icra orqanları məsələyə nəzarət edib. Kimsə nəsə quraşdıranda dərhal sorğu-sual edilib. Müəyyən anlaşmadan sonra tikintiyə razılıq verirdilər. Təsəvvür edin, yeddi-səkkiz il bundan əvvəl tövlələr tikilib. Hətta ferma tikən sahibkarlar var. Ümumiyyətlə, bu, qanunda ya birbaşa qadağa olunmalıdır, ya da hansısa ölçüdə icazə verilməlidir. İşə məmur qarışırsa, əlbəttə, orada rüşvət, anlaşma olur. Belə hallar, təəssüf ki, Azərbaycanda hələ də mövcuddur, davam edir. Hesab edirəm, kənd təsərrüfatına yararlı torpaqlarda müvəqqəti və ya daimi tikinti işlərinin aparılmasını qadağan etmək lazımdır. Çünki bizdə torpaq sahəsi onsuz da azdır və get-gedə azalır, məhsuldarlıq aşağı düşür. Torpağa ciddi şəkildə ehtiyacımız var. Müvəqqəti tövlələrin, fermaların tikintisi yalnız kənd təsərrüfatına yararlı olmayan sahələrdə aparılsa, daha yaxşıdır. Əvvəllər də sovet hökumətinin vaxtında belə olub. İmkan vermirdilər ki, kənd təsərrüfatına yararlı torpaqlarda tikinti işləri aparılsın. Qanunda da bu özünü göstərməlidir. Bütün bunlar nəzərə alınmalıdır. Təəssüf ki, Milli Məclisdə bir nəfər də olsun kənd təsərrüfatı sahəsi üzrə mütəxəssis yoxdur. Buna görə də belə qanunlar qəbul edilir. Əlbəttə, belə olan halda sui-istifadəyə yol verilir”.

Aytəkin Qardaşova

Tarix: 12 Dekabr 2025, 11:42

Xəbər lenti