BURADA REKLAMINIZ OLA
BİLƏR

Deputat: “Biz heç bir dövlətin qarşısında hesabat vermirik”

“Amnistiya Azərbaycanın özünə lazımdır. Biz heç bir dövlətin qarşısında hesabat vermirik. Heç bir siyasi güc mərkəzinin təsiri altında deyilik. Daxili siyasətimizdə nəyi nə cür edəcəyini Azərbaycan dövləti özü müəyyənləşdirir. Yeni amnistiya aktı da bir daha göstərir ki, Azərbaycan dövləti hər bir vətəndaşa, o cümlədən səhv addım atan, lakin dövlətdən ona qarşı humanist addım atılmasını gözləyən vətəndaşlara da aiddir”.

 

Bu sözləri Pravda.az-a açıqlamasında Milli Məclisin Müdafiə, təhlükəsizlik və korrupsiya ilə mübarizə komitəsinin üzvü Aydın Mirzəzadə deyib.

 

A.Mirzəzadə qeyd edib ki, amnistiya artıq müstəqil Azərbaycan dövlətçiliyinin çox parlaq səhifələrindən birinə çevrilib: “Həm Ulu Öndər Heydər Əliyevin dövründə, həm Prezident İlham Əliyevin fəaliyyəti dövründə dəfələrlə amnistiya təşəbbüsü ilə çıxış edilib və parlament tərəfindən dəstəklənib. Amnistiya vaxtilə cinayət törətmiş, cəzasından nəticə çıxarmış və cəmiyyət üçün təhlükəli olmayan insanlara yenidən azadlıq bəxş edilməsi, təkcə azad olunanların deyil, ailələrinin, yaxınlarının sevincidir. Bu isə yüz minlərlə, bəzən bir milyona qədər insan deməkdir. Sonuncu təşəbbüs isə həm əhatə dairəsinə, həm də azadlığa buraxılacaq insanların sayına görə tamamilə fərqlənir, 20 minə qədər insanı əhatə edəcək. Burada yeni yanaşma var - qadınlar, 60 yaşdan yuxarı insanlar azadlığa buraxılacaqlar. Bu, şəxsən cənab Prezidentimizin humanistliyini, vaxtilə səhv addım atmış insanlara yenidən bir şans verilməsidir. Amnistiya təşəbbüsü bir daha göstərir ki, Azərbaycan dövləti hər bir vətəndaşın dövlətidir. Dövlətin güclənməsi, vətəndaşın hüquqlarının qorunması, təhlükəsizliyin təmin edilməsi, səhv addım atan insanlara yenidən şans verilməsi Azərbaycan dövlətinin atributlarından hesab edilə bilər. Bu il bizim üçün yubiley ili - Konstitusiyamızın qəbul edilməsinin 30-cu ilidir. Ulu öndər Heydər Əliyevin rəhbərliyi ilə hazırlanmış, 30 ildə Azərbaycan dövlətçiliyinə xidmət edən əsas qanunumuzun yubileyi eyni zamanda tarixə düşəcək bu möhtəşəm amnistiya aktı ilə yadda qalacaq”.

 

Aytəkin Qardaşova

Tarix: 16 Dekabr 2025, 13:14   
Xəbər lenti
Çox oxunanlar

Ən son xəbərləri səhifəmizdən də izləyin