“Prius”unu “tap.az”da satdı, etibarnaməni ləğv etdirdi – İTTİHAM

Ali Məhkəmədə dələduzluqda ittiham edilərək bəraət almış K.Həsənovun barəsindəki qərardan dövlət ittihamçısı tərəfindən verilən kassasiya protesti və zərərçəkmişin kassasiya şikayəti üzrə məhkəmə iclası başa çatıb.

Pravda.az-ın əldə etdiyi məlumata görə, hakim Ələsgər Novruzovun sədrliyi ilə keçirilən prosesdə qərar elan olunub.

Qərara əsasən, protest və şikayət təmin edilməyib.

Qeyd: İstintaq orqanı tərəfindən K.Həsənova Cinayət Məcəlləsinin 178.2.4-cü (dələduzluq) maddəsi ilə ittiham irəli sürülüb.

İttihama əsasən, o, özgəyə məxsus əmlakı etibardan sui-istifadə etmə və aldatma yolu ilə ələ keçirmək məqsədilə özünə məxsus “Toyota” markalı “Prius” markalı avtomobilin satışı ilə bağlı cinayətkar niyyət formalaşdırıb. Bu məqsədlə onun niyyətindən xəbərsiz olan tanışları vasitəsilə 2022-ci ilin oktyabr ayında “tap.az” internet saytında satış elanı yerləşdirilib.

Elan əsasında zərərçəkmiş F.F. (adı, soyadı şərtidir) avtomobili 6 500 manata almaq barədə ilə razılığa gəlib. Razılaşmadan sonra zərərçəkmiş 18 saylı notariat ofisinin qarşısında ümumilikdə 6 500 manat məbləğində pul vəsaiti ödəyib. Həmin məbləğin 1 600 manatı avtomobilə dair yığılmış cərimələrin ödənilməsi, 200 manatı avtomobilin təmiri üçün ustaya verilməsi, 500 manatı “tap.az” saytında elan yerləşdirən şəxsin bank hesabına köçürülməsi, qalan 4 200 manatı isə digər şəxs vasitəsilə verilib.

İttihama görə, K.Həsənov həmin məbləği ələ keçirdikdən sonra avtomobilə dair zərərçəkmiş şəxsin adına 18 saylı notariat ofisində verilmiş “nəqliyyat vasitələrinə sərəncam verilməsi haqqında” etibarnaməni 26 mart 2023-cü il tarixdə ləğv etdirib və nəticədə F.F.-ə ümumilikdə 6 500 manat məbləğində xeyli miqdarda maddi ziyan vurub.

Xətai Rayon Məhkəməsinin hökmü ilə K.Həsənovun təqsirliliyi sübuta yetirilmədiyindən ona bəraət verilib. Barəsində seçilmiş başqa yerə getməmək haqqında iltizam qətimkan tədbiri dərhal ləğv edilib, mülki iddia baxılmamış saxlanılıb və zərərçəkmiş şəxsə mülki mühakimə icraatı qaydasında iddia vermək hüququ izah olunub.

Hökmdən dövlət ittihamçısı tərəfindən apellyasiya protesti, zərərçəkmiş şəxs və onun nümayəndəsi tərəfindən isə apellyasiya şikayətləri verilib. Lakin Bakı Apellyasiya Məhkəməsinin qərarı ilə apellyasiya protesti və apellyasiya şikayətləri təmin edilməyib, Xətai Rayon Məhkəməsinin hökmü dəyişdirilmədən qüvvədə saxlanılıb. Bakı Apellyasiya Məhkəməsinin həmin qərarından dövlət ittihamçısı tərəfindən kassasiya protesti, zərərçəkmiş şəxs və onun nümayəndəsi tərəfindən isə kassasiya şikayəti verilib.

Kamal Məmmədov

Tarix: 19 Dekabr 2025, 08:33

Xəbər lenti