“Sosial şəbəkələr real həyatdakı davranışımızın davamıdır” - RƏY

“Sosial şəbəkələr, açıq məlumat platformasıdır. Hər kəs burda kontent yaradır, paylaşır. Öz bilik, düşüncə, dünyagörüşü çərçivəsində məlumatlar yayır. Müsbət tərəfi budur. Təəssüf ki, bəzən elə resurslar, profillər olur ki, onlar həqiqətən cəmiyyətə açıq hörmətsizlik göstərir, qadağan olunmuş, etik cəhətdən qəbul olunmayan davaranışlara yol verir, çağırışlar edir. Bunlar birmənalı şəkildə qəbulolunmazdır”.

Bu sözləri Pravda.az-a açıqlamasında media eksperti, professor Qulu Məhərrəmli deyib.

Dövlət başçısından Qulu Məhərrəmli ilə bağlı SƏRƏNCAM Pravda.az

Onun sözlərinə görə, sosial şəbəkəyə daxil olan hər kəs müəyyən sosial etik öhdəliklər götürməlidirlər: “Əxlaqdankənar hansısa davranışa yol verilməməlidir. İnsanlarda belə düşüncə var ki, sosial şəbəkələrdə nə istəsən, deyə bilərsən, burada qisasçılıqla da məşğul ola bilərsən, istədiyin adama istədiyin böhtanı da yapışdıra bilərsən, müxtəlif görüntülər də paylaşa bilərsən. Ancaq elə deyil. Çünki sosial şəbəkələr bizim real həyatdakı davranışımızın davamıdır. Burada etik hədlər gözlənilməlidir. Bu səbəblərə görə saytlar və sosial şəbəkələrdə cəmiyyətə açıq hörmətsizlik hərəkətlərinin qadağan olunması vacibdir, labüddür. Bu istiqamətdə atılan addımları dəstəkləyirik”.

Media hüququ üzrə ekspert Xalid Ağaliyev bildirib ki, qanunvericilikdə dəqiqləşdirmə yaradan dəyişiklikdir:

Xalid Ağaliyev: İnternet televiziyalarının lisenziyalaşdırılması ifadə azadlığına ziddir

“İnformasiya, informasiyalaşdırma və informasiyanın mühafizəsi haqqında” qanuna edilmiş yeni dəyişiklik hər hansı yeni situasiya yaradan dəyişiklik kimi qəbul edilməməlidir. 2022-ci ildə qəbul edilmiş "Media haqqında" qanunda bununla bağlı göstəriş var. Həmin qanunun 14-cü maddəsində göstərilib ki, "əxlaqdankənar leksik (söyüş) məzmunlu söz və ifadələrdən, jestlərdən istifadəyə yol verilməməlidir". Saytlar, sosial media da bu qanunun təsiri altına düşür. Qanunda göstəriş var idi, ancaq inzibati qanunvericilikdə qadağan edilən hərəkətlərə görə hansı məsuliyyət növünün tətbiq ediləcəyi aydın deyildi. Biz dəfələrlə belə hərəkətlərə görə məsuliyyətin tətbiq edildiyini müşahidə etmişik, ancaq bu zaman adətən, inzibati qanunvericiliyin birbaşa uyğun müddəaları tətbiq edilmədən baş verirdi”.

Xatırlatma: Prezident İlham Əliyev “İnformasiya, informasiyalaşdırma və informasiyanın mühafizəsi haqqında” qanunda dəyişikliyi təsdiqləyib. Belə ki, kütləvi nümayiş etdirildiyi halda ictimai mənəviyyatı təhqir edən, cəmiyyətə açıqca hörmətsizlik ifadə edən hərəkətlərin edilməsinə, yəni əxlaqsız ifadələrin səsləndirilməsinə və ya belə məzmun təəssüratı yaradan jestlərin edilməsinə, yaxud bədəninin hissələrinin insan əxlaq normalarına və milli-mənəvi dəyərlərə zidd formada göstərilməsinə dair məlumatların yayılması qadağan edilib.

Şəhanə Quliyeva

Tarix: 16 Yanvar 2026, 18:52

Xəbər lenti