“Aqroservis”in anbardarı kombaynlarını satmaq adı ilə dələduzluq etdi – HÖKM

Gəncə Ağır Cinayətlər Məhkəməsində dələduzluqda təqsirləndirilən Zahid Kərimovun (adı, soyadı şərtidir) cinayət işi üzrə məhkəmə istintaqı başa çatıb.

Pravda.az-ın əldə etdiyi məlumata görə, hakim Dadaş İmanovun sədrliyi ilə keçirilən prosesdə hökm oxunub.

Məhkəmənin hökmü o, 2 il müddətə azadlıqdan məhrum edilib.

İttiham aktına əsasən, təqsirləndirilən şəxs təkrarən dələduzluq cinayətləri törətməklə, etibardan sui-istifadə etmə və aldatma yolu ilə özgənin külli miqdarda əmlakını ələ keçirib.

Belə ki, Zahid Kərimov tamah niyyəti ilə hərəkət edərək dostu D.D.-yə (adı, soyadı şərtidir) guya “Aqroservis” ASC-nin Bərdə Regional İdarəsinin Ağdam rayon bölməsinə təhkim olunmuş 2 ədəd “Sampo 2045” markalı taxılbiçən kombaynın satın alınmasında köməklik göstərəcəyinə inandırıb. Bu məqsədlə zərərçəkmiş şəxsləri yalan vədlərlə aldadaraq müxtəlif vaxtlarda pul vəsaitləri ələ keçirib.

İstintaqla müəyyən edilib ki, təqsirləndirilən şəxs 11 fevral 2023-cü il tarixdə Ağdam rayonu, Quzanlı qəsəbəsində yerləşən ASC-nin inzibati binasının qarşısında dostu vasitəsilə D.D.-yə məxsus 27 min manat pulu alıb. Bundan sonra o, kənd təsərrüfatı bitkilərinin becərilməsi üçün fermerlərə ayrılan subsidiyaların guya daha sərfəli şəkildə mineral gübrələrin alınmasına yönəldilməsi və satışından yüksək gəlir əldə olunacağı barədə yalan məlumatlar verərək zərərçəkmiş şəxsi yenidən aldadıb.

Bu yolla Zahid 2023-cü ilin mart ayı ərzində müxtəlif gün və vaxtlarda Ağdam rayonu ərazisində D.D.-yə məxsus olmaqla 7 min, 11 min, 16 min 500, 17 min 500 və 20 min manat məbləğlərində pul vəsaitlərini ələ keçirib. Nəticədə vahid niyyətlə həyata keçirilmiş bu əməllərlə D.D.-yə ümumilikdə 99 000 manat məbləğində külli miqdarda maddi ziyan vurulub.

Bununla yanaşı, təqsirləndirilən şəxs təkrarən analoji üsullarla digər şəxslərə qarşı da dələduzluq əməlləri törədib. Belə ki, cinayətdən xəbəri olmayan dostu vasitəsilə tanış olduğu digər şəxsi aldadaraq onun atası zərərçəkmiş F.F.-ə (adı, soyadı şərtidir) məxsus pul vəsaitlərini ələ keçirib. İstintaq materiallarına əsasən, 2023-cü ilin mart ayının sonları və aprel ayının əvvəllərində müxtəlif ünvanlarda keçirilən görüşlər zamanı 7 min, 8 min, 300 manat, 3 min, 5 min, 10 min və digər məbləğlər olmaqla ümumilikdə 43 300 manat pul vəsaiti qanunsuz yolla əldə edilib.

Pul vəsaitlərinin bir hissəsi bank kartına köçürülərək sonradan nağdlaşdırılıb, digər hissəsi isə birbaşa zərərçəkmiş şəxslərdən alınmaqla mənimsənilib. Beləliklə, təqsirləndirilən şəxs vahid niyyətlə, etibardan sui-istifadə və aldatma yolu ilə zərərçəkmişlərə xeyli miqdarda maddi ziyan vurmaqla təkrarən dələduzluq cinayəti törədib.

Məhkəmə baxışı zamanı Zahid Kərimov Cinayət Məcəlləsinin 178.3.2-ci maddəsi ilə ona elan olunmuş ittiham üzrə özünü təqsirli bilib və əməlini etiraf edib.

Qeyd: Zahid Kərimov “Aqroservis” ASC-nin Bərdə Regional İdarəsinin Ağdam rayon Bölməsində anbardar işləmişdi.

Kamal Məmmədov

Tarix: 3 Fevral 2026, 09:04

Xəbər lenti