“İndi 30-35 min manatlıq əməliyyatlar sığorta ilə pulsuz edilir”

Vətəndaşların Xidmətlər Zərfi çərçivəsində İcbari Tibbi Sığorta üzrə Dövlət Agentliyinin müqavilə bağladığı özəl tibb müəssisələrinin sayının artırılması vətəndaşlara tibbi xidmətlərə əlçatanlığını yüksəltmək məqsədi daşıyır. Belə ki, pasiyentə TƏBİB-in tabeliyində olan dövlət tibb müəssisələrində müvafiq xidmətin göstərilməsi mümkün olmadığı təqdirdə Agentliyin müqavilə bağladığı özəl tibb müəssisələrinə göndəriş verilir. Vətəndaş verilən göndəriş vərəqəsi əsasında özəl tibb müəssisəsinə müraciət etdikdə Xidmətlər zərfi çərçivəsində tibbi xidmətlərdən ödənişsiz yararlanır. Vətəndaş göndəriş vərəqəsi olmadan özəl tibb müəssisələrinə birbaşa müraciət etdikdə isə tibbi xidmətdən öz vəsaiti hesabına yararlanır.

Bəs ödəniş və göndəriş üsulundan asılı olmayaraq icra olunan əməliyyat və prosedurlarda hansısa fərq mövcuddur?

Mövzu ilə bağlı Pravda.az-a açıqlama verən kardioloq-aritmoloq Günay Rəhimova bildirib ki, xəstəyə və ya əməliyyata yanaşma baxımından hansısa fərq yoxdur:

Həkimlərimiz - Günay Rəhimova - Gəncə Beynəlxalq Xəstəxanası

“Bizim sahə üzrə əməliyyatlar çox bahalıdır. Bütün əməliyyatları İcbari Tibbi Sığorta ödəyir. Göstərilən xidmət keyfiyyətində də hansısa fərq yoxdur. Bunu pasiyentlər də deyə bilər. İcbari Tibbi Sığortanın da ödənişi ilə sığortasız gələn pasiyentin ödənişi eyni mahiyyət kəsb edir. Burada insan faktoru var. Məsələn, ödənişli zamanlarda sığorta olmadıqda, hansısa həkim xəstə ilə normal davranmırsa, deməli, o, indi də sığorta ilə əməliyyat olana qarşı da eyni münasibəti bəsləyəcək. Amma bizim davranış tərzimiz eyni qaydada davam edir. Hətta deyə bilərəm ki, xəstələr elə əməliyyatlardan yararlanırlar ki, o əməliyyatlar əvvəllər xəyal kimi idi. Məsələn, aorta qapağının dəyişdirilməsi əməliyyatı invaziv yolla həyata keçirilir. 30-35 min manat idi... Hazırda pasiyentə həmin əməliyyat tamamilə ödənişsiz icra edilə bilir. Ürəkdaxili cihazların taxılmasına pasiyentlər öncə 15 min manat ödəyirdisə, hazırda İcbari Tibbi Sığorta bunu qarşılayır və bu, həyat qurtaran cihazdır. Ona görə yanaşma formasında da fərq ola bilməz. Əksinə həkimlərin işi əvvələ baxanda daha çox olur. Çünki pasiyent sayı çoxalıb. Pasiyent narazı qalsaydı, niyə başqa pasiyentə tövsiyə edirlər? Xidmət eynidir və bu, pasiyentə çox köməklik göstərir”.

Professor Adil Qeybullanın sözlərinə görə, imkan daxilində dövlət, özəl yəni mülkiyyət formasından asılı olmayaraq bütün xəstəxanalar İcbrari Tibbi Sığortaya cəlb edilməlidir:

Adil Qeybulla: “Avtomobilinizi namaz qılanın, seyidin yanına təmirə qoysanız, nəyisə dəyişdiriləcək, oğurlanacaq...” Pravda.az

“Təbii ki, özəl sektor öz arzusundan asılı olaraq edir, ancaq mütləq təklif edilməlidir. Xəstəxanaların İcbari Tibbi Sığortaya cəlb olunması onların inkişafında xüsusi stimul olacaq. O ki qaldı xəstələrin sığorta və ya qeyri-sığorta ilə əməliyyat olma keyfiyyətlərinə burada heç bir keyfiyyət fərqindən söhbət gedə bilməz. Bir xəstəni həkimə 50 adam tapşırsa da, xüsusi klinikada olsa da, əməliyyatı eyni formada gedir. Təbii ki, əməliyyatı edən həkimin nə dərəcədə peşəkar olması önəm kəsb edir, ancaq keyfiyyət fərqi ola bilməz. Əməliyyatlar standartlara, kliniki protokollara əsaslanaraq icra edilir. Bu baxımdan bu məsələyə şübhə ilə yanaşılması doğru olmaz”.

Şəhanə Quliyeva

Tarix: 6 Fevral 2026, 08:52

Xəbər lenti