BURADA REKLAMINIZ OLA
BİLƏR

Deputat: “Vaşinqtonla münasibətlərimizin inkişaf etdirilməsi heç bir halda Moskva əleyhinə deyil”

“Cənab Prezident İlham Əliyev müstəqil və Azərbaycan xalqının milli maraqlarından irəli gələn bir siyasət həyata keçirir. Bu siyasət sayəsində dünyanın 30 ölkəsi ilə Azərbaycan strateji sənədlər imzalayıb. Fevralın 10-da dünyanın fövqəl dövləti Amerika ilə strateji tərəfdaşlıq xartiyası imzalandı. 2022-ci ildə Rusiya Federasiyası ilə də münasibətlərimiz strateji tərəfdaşlıq və müttəfiqlik səviyyəsinə yüksəldilib. Burada hər hansı təzad yoxdur. Həm Rusiya ilə, həm də ABŞ ilə müvafiq sənədlər imzalanır. ABŞ və Rusiya bir-birinə qarşı dayanan tərəflərdir. Müxalifət bu məsələlərdə guya Azərbaycan dövlətinin düzgün olmayan siyasət yeritdiyini iddia edir. Bu, çox əsassız iddiadır. Azərbaycan Prezidenti müstəqil siyasət həyata keçirir. Vaşinqtonla münasibətlərimizin inkişaf etdirilməsi heç bir halda Moskva əleyhinə deyil. Kremldə də bunu gözəl bilirlər”.

 

Bu sözləri Pravda.az-a açıqlamasında Milli Məclisin deputatı Elman Nəsirov deyib.

 

Deputat bildirib ki, Azərbaycanın Rusiya ilə müvafiq sənəd imzalaması Ağ Evin əleyhinə deyil: “Bunu Vaşinqtonda da çox yaxşı başa düşürlər. Azərbaycan dövlət başçısının yeritdiyi siyasətin fəlsəfəsini dünyanın əsas mərkəzlərində gözəl anlayırlar. Bilirlər ki, bu siyasət heç bir halda üçüncü tərəfi hədəf almayıb, qarşılıqlı, faydalı əməkdaşlıq münasibətləridir. Nəyəsə lupa altında baxmağın mənası yoxdur. Həmin müxalifət nümayəndələrinə söyləyirəm ki, bu gün ABŞ və Avropa İttifaqı arasında münasibətlər heç də ürəkaçan səviyyədə deyil, çox ciddi ixtilaflar, çətinliklər mövcuddur. Azərbaycan isə Avropa İttifaqının on dövləti ilə strateji tərəfdaşlıq sənədi imzalayıb. Eyni zamanda ABŞ-də də müvafiq sənəd imzalandı. Yəni burada əsas məsələ Azərbaycan dövlətinin, xalqının milli maraqları, onun təhlükəsizliyinin təminatıdır. Ən başlıcası, bütün bunlar müstəqil siyasətin ifadəsidir. Azərbaycan dövlətinə, onun siyasi liderinə dünya miqyasında olan yüksək etimadın kökündə dayanan çoxsaylı fundamental səbəblər var. Bunlardan ən əsası müstəqil, milli maraqlara söykənən və heç bir üçüncü tərəfi hədəf almayan siyasətdir”.

 

Aytəkin Qardaşova

Tarix: 12 Fevral 2026, 12:23   
Xəbər lenti
Çox oxunanlar

Ən son xəbərləri səhifəmizdən də izləyin