Təhsil nazirinin adının qarşısında saxta imza icra edərək özəl klinikada həkim kimi fəaliyyət göstərdi - QƏRAR

Şirvan Apellyasiya Məhkəməsində rəsmi sənəd hazırlamada təqsirləndirilən Vüqar Səfərovun (soyadı şərtidir) barəsindəki hökmdən verilən apellyasiya şikayəti üzrə məhkəmə iclası başa çatıb.

Pravda.az-ın əldə etdiyi məlumata görə, hakim Habil Bəhmənovun sədrliyi ilə keçirilən prosesdə qərar elan olunub.

Qərara əsasən, apellyasiya şikayətindən imtinası qəbul olunub və apellyasiya şikayətinə baxılmasına xitam verilib.

İttihama görə, Vüqar Səfərov 2020-ci ilin fevral ayında istintaqa dəqiq məlum olmayan tarixdə və vaxtda saxta sənəd hazırlayıb. O, Təhsil Nazirliyinin adından verilmiş şəhadətnaməni kompüter vasitəsilə saxta məlumatlarla tərtib edərək çap edib, həmin sənəddə nazirin adının qarşısında saxta imza icra edib və istintaqa məlum olmayan şəraitdə hazırladığı saxta möhürlə təsdiqləyib. Saxta sənəddə guya Beynəlxalq Ekologiya və Tibb Akademiyası tərəfindən verilmiş ali təhsil haqqında bakalavr diplomunun Azərbaycan Respublikasında “Müalicə işi” ixtisası üzrə dermatoveneroloq bakalavr dərəcəsinə ekvivalent olduğu göstərilib.

Təqsirləndirilən şəxs həmin 2020-ci il tarixli saxta şəhadətnaməni istifadə etmək məqsədilə hazırlayaraq, saxta olduğunu bilə-bilə 2022-ci ilin yanvar ayında Azərbaycan Respublikası Səhiyyə Nazirliyinə təqdim edib. Nəticədə nazirlik tərəfindən 13 yanvar 2022-ci il tarixli şəhadətnamə ilə onun tibbi və əczaçılıq fəaliyyəti ilə məşğul olmasına icazə verilib.

Bundan sonra, 17 yanvar 2022-ci il tarixdə Vüqar Səfərov əldə etdiyi həmin şəhadətnaməni, öz adına verilmiş diplomun apostil olunmuş əslini və saxtalaşdırdığı hüquq verən sənədi saxta olduğunu bilə-bilə özəl tibb müəssisələrdən birinə təqdim edib.

Beləliklə, təqsirləndirilən şəxs həmin sənədlər əsasında müəssisəni aldadaraq həkim-dermatoveneroloq vəzifəsinə işə qəbul olunub və qulluq mövqeyindən istifadə etməklə 2022-ci ilin yanvar-dekabr ayları ərzində əmək haqqı qismində ümumilikdə 4 178,82 manat məbləğində pul vəsaitini vahid niyyətlə əhatə olunan qəsdlə ələ keçirib.

Cəlilabad Rayon Məhkəməsinin hökmü ilə Vüqar Səfərov Cinayət Məcəlləsinin 320.1-ci maddəsi ilə 3 000 manat, 320.2-ci maddəsi ilə isə 1 000 manat məbləğində cərimə cəzasına məhkum edilib. Cinayət Məcəlləsinin 66.2-ci maddəsinə əsasən təyin edilmiş cəzalar qismən toplanaraq ona qəti olaraq 3 200 manat məbləğində cərimə cəzası təyin olunub. Barəsində seçilmiş polisin nəzarəti altına vermə qətimkan tədbiri hökm qanuni qüvvəyə minənədək dəyişdirilmədən saxlanılıb. Hökmdən təqsirləndirilən şəxs apellyasiya şikayəti versə də, ilkin baxış iclası mərhələsində məhkəməyə ərizə təqdim edərək şikayətindən imtina etdiyini bildirib.

Kamal Məmmədov

Tarix: 20 Fevral 2026, 09:44

Xəbər lenti