“m10”la bağlı nə baş verir? – “Hətta 500 manat dəyərində məbləğlərin bloklanmasından söhbət gedirsə, bu, müştərilərin inamını sarsıdır”

““m10”la bağlı son baş verənlərdə iki istiqamət əsas seçilir. Birincisi, “m10” elektron pul kisəsinə, sistemlərinə hansısa kiber müdaxilə həyata keçirilib. Digər variant isə budur ki, “m10”da mövcud olan qaydalar sərtləşib, nəzarətedici və tənzimləyici qurumların göstərişi, təlimatı ilə vəsaitlərin geniş təftişinə başlanılıb, hansısa şübhəli köçürmələr, əməliyyatlar, mənbəyi məlum olmayan maliyyə vəsaitlərimin hamısı bloklanıb. Hər iki istiqamət üzrə narahatedici məqamlar çoxdur. Kibertəhlükəsizlik üzrə danışsaq, nəzərə almalıyıq ki, bu cür şirkətlərin finteks sferasında, maliyyə xidmətləri göstərən şirkətlərin fəaliyyətinə nəzarət Mərkəzi Bank tərəfindən olunur. Tənzimləyici və nəzarətedici qurum Mərkəzi Bankdır. Bu cür təşkilatların infrastrukturu yoxlanılmadan, auditlərdən keçmədən, müəyyən reytinq qiymətləndirilməsi almadan fəaliyyət göstərmələrinə icazə verilməməlidir. O demək deyil, mütləq şəkildə deyirəm ki, kiber müdaxilə, yaxud auditlər həyata keçirilib, ya yox... Bu barədə ictimaiyyətə açıq rəsmi məlumat yoxdur. Biz ehtimallarımızı irəli sürürük”.

Bu sözləri Pravda.az-a açıqlamasında İKT üzrə mütəxəssis Fərhad Mirəliyev deyib.

Mütəxəssis saytların çökməsindən danışdı: “Burada sərt planlaşdırma aparıla bilməz” Pravda.az

Mütəxəssis bildirib ki, sosial şəbəkələrdə təkcə “m10”la bağlı deyil, digər bankların da müstəriləri tərəfindən xeyli sayda vəsaitlərin bloklanması, onlardan imtina olunması əvəzində, hesabın açılması kimi məsələlərə rast gəlinir: “Belə izah edirlər ki, bu, bankların maliyyə sferasında çalışan təşkilatların öz şəxsi təşəbbüsləri deyil, daha yuxarı tənzimləyici və nəzarətedici təşkilatların göstərişi ilə həyata keçirilən addımlardır. Dediyim kimi, burada əsas təşkilat Mərkəzi Bankdır. Narahatedici məqam budur ki, insanlar bir-birilərinə hansısa məqsəd, yaxud sövdələşmə çərçivəsində müəyyən vəsaitlər göndərirlərsə, o zaman həmin hesablarda olan vəsaitin bloklanması halları kütləvi şəkildə müşahidə edilir. Əlbəttə, böyük məbləğlərdən söhbət getmir. 100-200, hətta 500 manat dəyərində məbləğlərin də bloklanmasından söhbət gedir. Çox təəssüf doğurur ki, bu cür kiçik məbləğlər təftiş olunur, yoxlanılır. İndiki dövrdə bu cür yoxlamalar müştərilərin sektora olan inamını sarsıdır. Kütləvi şəkildə insanlar artıq bu xidmətlərdən istifadə etməyə çəkinirlər, yaxud digər alternativ yollar axtarırlar. Haqlı məsələlər də ola bilər. Bilirik ki, “m10” üzərindən kriptovalyuta alış-verişi, mərc oyunları saytlarına köçürmələr həyata keçirilirdi. Bu cür hallar fərdi qaydada araşdırıla bilər. Amma kütləvi şəkildə hesablarda olan məbləğlərin bloklanması xeyli sayda insanı narazı salır. Bu cür layihələr, yaxud start-aplar bazarda özünü tanıtmış təşkilatlar xeyli sayda müştəri itirilməsinə səbəb olurlar”.

Aytəkin Qardaşova

Tarix: 25 Fevral 2026, 14:18

Xəbər lenti