Türkiyədən Azərbaycana saxta dollar gətirən qadınla bağlı məhkəmə qərarı açıqlandı

Ali Məhkəmədə saxta dollar satmaqda təqsirləndirilən Səadət Məmmədovanın barəsindəki qərardan verilən kassasiya şikayəti üzrə məhkəmə iclası başa çatıb.

Pravda.az-ın əldə etdiyi məlumata görə, hakim İlqar Cəfərovun sədrliyi ilə keçirilən prosesdə qərar elan olunub.

Qərara əsasən, kassasiya şikayəti təmin edilməyib.

İttihama görə, Səadət Məmmədova saxta pul əldə etmə və satma barədə əvvəlcədən başqa şəxslərlə razılaşaraq cinayət əlaqəsinə girib. O, qabaqcadan əlbir olan bir qrup şəxs halında birləşib, bu məqsədlə ölkə xaricində olan Murad Əbdürrəhimovdan saxta pulları əldə edərək Azərbaycan ərazisində onun dediyi şəxslərə satmalı imiş. Qadın pulların saxta olmasından məlumatı olmayan tanışı Səlim Əliəsgərovla Türkiyəyə gedərək orada Murad Əbdürrəhimovdan ümumilikdə 40 000 ABŞ dolları məbləğində saxta, ofset çap üsulu ilə hazırlanmış və eyni nominallı həqiqi pul əsginasları ilə eynilik təşkil etməyən, xarici valyutanı satış məqsədilə əldə edib və Azərbaycana gətirib.

Səadət Məmmədova yenidən pulların saxta olmasından məlumatı olmayan tanışı Şəfaqət Məmmədova ilə Türkiyəyə gedərək orada Murad Əbdürrəhimovdan ümumilikdə 30 000 ABŞ dolları məbləğində saxta, ofset çap üsulu ilə hazırlanmış və eyni nominallı həqiqi pul əsginasları ilə eynilik təşkil etməyən xarici valyutanı satış məqsədilə təkrarən əldə edərək Azərbaycana gətirib.

O, bundan başqa istintaqa məlum olmayan mənbədən ofset çap üsulu ilə hazırlanmış və eyni nominallı həqiqi pul əsginasları ile eynilik təşkil etməyən 54 300 saxta ABŞ dolları məbləğində olmaqla, xarici valyutanı satış məqsədilə təkrarən əldə edərək Azərbaycana gətirib.

O, bundan sonra cinayətkar fəaliyyətin davamı olaraq Murad Əbdürrəhimov ilə aralarında olan cinayətkar razılaşmaya və rol bölgüsünə əsasən, onun tapşırığı ilə əldə etdiyi eyni nominallı həqiqi pul əsginasları ilə eynilik təşkil etməyən, 124 300 saxta ABŞ dolları nominallı pul əskinaslarından Ələmdar Cahangirova 34 000 manat dəyərində saxta 20 000 ABŞ dolları, Elmar Ağayevə 23 120 manat dəyərində saxta 13 600 ABŞ dolları, Seymur Rəcəbova 37 740 manat dəyərində saxta 22 200 ABŞ dolları və Elçin Mehtiyevə 16 450 manat dəyərində xeyli miqdarda saxta 68 500 ABŞ dolları nominallı pul əsginaslarını təkrarən satıb.

İş üzrə 4 nəfər zərərçəkmiş şəxs qismində tanınıb.

Səadət Məmmədova qarşı Cinayət Məcəlləsinin 204.2-ci (saxta pul və ya qiymətli kağızlar hazırlama, əldə etmə və ya satma) maddəsi ilə ittiham irəli sürülüb.

Bakı Ağır Cinayətlər Məhkəməsinin hökmü ilə o, 7 il müddətinə azadlıqdan məhrum edilib. Bakı Apellyasiya Məhkəməsinin qərarına əsasən, şikayət təmin edilməyib.

Xatırlatma: Səadət Məmmədova həbs edilənə kimi müxtəlif təhsil müəssisələrində müəllim kimi çalışıb.

Kamal Məmmədov

Tarix: 2 Mart 2026, 08:32

Xəbər lenti