BURADA REKLAMINIZ OLA
BİLƏR

“İran və İsrail heç vaxt müharibə etməyəcək” deyən Tural Abbaslıdan AÇIQLAMA

Ağ Partiyanın sədri Tural Abbaslı bir müddət əvvəl müsahibəsində İran və İsrailin heç vaxt müharibə etməyəcəyi barədə fikirlərinin yenidən gündəmə gətirilməsinə, sosial şəbəkələrdə tənqid edilməsinə münasibət bildirib.

 

T.Abbaslı Pravda.az-a açıqlamasında deyib ki, uzun illərdir, İran-İsrail məsələsi müzakirə olunur.

 

O xatırladıb ki, İranda İslam İnqilabı olan gündən bu günə qədər İran rəsmiləri İsraili yer üzündən siləcəklərini bəyan ediblər: “Eyni zamanda, İsrail hakimiyyəti bu gün, sabah İranı vuracağı, rejimi dəyişəcəyi barədə bəyanatlar verirdi. Ən azından, son 30 ilə baxsanız, görərsiniz ki, bunlar dönəm-dönəm daxili siyasətə, daxili auditoriyaya hesablanmış bəyanatlar olub. Bir çox hallarda İran və İsrail bir-birinə qarşı düşmənçiliklərini daxili auditoriyada narazılıq yatırmaq, seçkiqabağı situasiyanı dəyişmək, bir sözlə öz maraqları üçün çox məharətlə istifadə ediblər”.

 

T.Abbaslı qeyd edib ki, səsləndirdiyi fikirlər o zamana uyğun olub: “Siyasətdən anlayışı olan bilir ki, neçə illərdir, bu məsələ davam edir. Beş-altı ay əvvəl deyilmiş fikirləri bu günə istinad edib, "proqnoz" adlandırmaq olmaz. İran və İsrailin daxili siyasətindən bir az xəbəri olanlar bilirlər ki, İranda İsrailə, İsraildə isə İrana münasibət hər zaman daxili siyasətə yön verən, həlledici məqamlardan biri olub. Bu düşmənçilikdən həmişə istifadə ediblər. Necə ki Soyuq Müharibə dönəmində Amerika, SSRİ bu qarşıdurmadan istifadə edirdi, yaxud Amerika, Şimali Koreya məsələləri, "xortdan" obrazları yaradaraq bir-birilərinin əhalisinə göstərdikləri münasibət, Cənubi Koreyanın Şimali Koreyaya münasibətləri - bunların hər biri auditoriya üçün siyasi predmet olub. Heç kimə sirr deyil ki, İsrailin Baş naziri Netanyahuya artıq öz ölkəsində belə cinayət işi açılıb. Netanyahunun atdığı addımlar bir çox hallarda İranla müharibədən daha çox özünün və hakimiyyətinin prosesdən canını qurtarması üçündür. İrandakı vəziyyəti nəzərə alsaq, görərik ki, İranla İsrail bir-birinə raket atmazdan öncə xalq ayağa qalxmışdı, etirazlar edirdi. Hətta minlərlə insan, dinc əhali İran rejimi tərəfindən məhv edildi. İsraillə qarşıdurma söhbəti çıxan kimi daxildə rejimin təhlükəsizliyi, demək olar, təmin olundu. Yəni fikirlərim bu kontekstdə deyilmişdi. Bir az siyasi analiz qabiliyyəti olanlar bilirlər ki, belədir”.

 

Aytəkin Qardaşova

Tarix: 3 Mart 2026, 12:57   
Xəbər lenti
Çox oxunanlar

Ən son xəbərləri səhifəmizdən də izləyin