Fazil Mustafa “Çox vaxt qadınlar uşaq dünyaya gələndən sonra aliment almaq üçün boşanırlar” fikrinə aydınlıq gətirdi

Deputat Fazil Mustafanın Milli Məclisin bu gün keçirilən iclasında səsləndirdiyi “Çox vaxt qadınlar məqsədli şəkildə ilk uşaq dünyaya gələndən sonra aliment almaq üçün boşanırlar” fikri cəmiyyətdə birmənalı qarşılanmayıb. Deputatın bu çıxışı sosial şəbəkələrdə və ictimai müzakirələrdə mübahisələrə səbəb olub.

F. Mustafa Pravda.az-a açıqlamasında deyib ki, Azərbaycan cəmiyyətində belə bir “xəstəlik” yayğınlaşıb, hansısa kateqoriyadan olan insanlar haqqında hansısa epizodu qeyd edirsənsə, birdən onun ilahiləşdirməsi başlanılır: ““Ola bilməz”, “Azərbaycan qadınına bunu demək olmaz”, yaxud hansısa bir kateqoriyadan olan peşə sahibinə bunu demək olmaz. Yəni burada niyə ümumiləşdirilmə aparılmalıdır? Konkret faktlara görə danışırıq. Qəbulumuza insanlar gəlirlər... Məhkəmələrlə, hakimlərlə, Mediasiya Şurası ilə söhbətlər aparırıq. Bilgilər əsasında bu fikirləri səsləndiririk. Vəkil dostlarımızdan bu bilgiləri alırıq. Bu hamısı nə deməkdir? Bu halların olması yayğınlaşmağa başladığına görə də onun qarşısını almaq üçün bu fikirlər səsləndirilir. Burada təkcə alimentdən söhbət getmir ki?! Mülkdən, torpaq sahəsindən və başqa məsələlərdən də söhbət gedir. Yəni ona görə də bu məsələ təkcə alimentlə yekunlaşmır. Bəzi kişilər var ki həqiqətən də ailənin dağılmasında maraqlı olmurlar, burada maraqlı tərəflər qadınlar olurlar. Böyük bir qismində də kişilər olur. Bu da deyilir də onsuz da. Təəccüblü, anlaşılmayan nə var? Bu qədər cahilcəsinə deyilən fikirləri anlamamaqda israr edənlərin məqsədini başa düsmək olmur. Biz fikri deyirik ki, bu daha təhlükəli tendensiyadır. Biri var psixoloji, hansısa bir uyuşmazlıq və s. bunu anlayışla qarşılamaq mümkündür. Keçimsizlikdir, ailələr dağılır... Amma bu motivə görə də dağılan ailələrin sayı artmaqdadır. Buna görə biz buna diqqət çəkirik ki, məhkəmələrdə aydınlaşsın. Biz kimisə ittiham etmirik”.

F.Mustafa onu da əlavə edib ki, bu niyyətlə ailələri dağıdan hansısa qadınlar varsa, onlara imtiyazın verilməsi lazım deyil: “Burada söhbət daha çox maaş alan insanlardan vəsaitin tutulmasından gedir. Adam gedib yenidən evlənir, normal həyat qurmaq istəyir, evinin maaşının yarısı aliment pulu olaraq gedir... Bunu nəzərə alırlar ki, çox maaş alır, sərf edir və bu addımı atırlar. Onlarla adam məndən xahiş edir, həyatları ilə bağlı epizodları danışırlar. Böyük əksəriyyəti tanıdığım insanlardır. Əsaslı fikirlərdir, yoxlayıb araşdırdıqdan sonra bu fikirlər səsləndirilir. Buna görə də yanlış tendensiyanı qurtarmaq üçün bu addım atılır. Həm də söhbət sənin, mənim rəyimdən getmir. Birinci adamlar Mediasiya Şurasına müraciət edirlər. Mediasiya araşdıranda məlum olur ki, hansı səbəbdən ailə dağılır. Əlbəttə, uşaqları nəzərdə tutan addımlar atılmalıdır. Amma bunu kim atmalıdır? Dövlət tərəfindən fond yaradılmalıdır, fond vasitəsilə bu vəsaitlərin ödənilməsi nəticəsində uşaqların ayaqda qalması vacibdir. Bu uşaqlar üçün ayrıca internat məktəbləri müəyyən olunması lazımdır ki, valideynin baxmaq imkanı yoxdursa, modellər var… Təhsili, yaşamı hamısı dövlət tərəfindən qarşılanmalıdır. Bizdə bu sahədə müəyyən formalaşmamış bir mühit var. Olsun, bunu formalaşdıraq. Bu da təkliflərdir. Yoxsa “Azərbaycanda belə bir qadın ola bilməz” ifadələrinə bu Məhsətinin siqaret çəkməsinə, fərqli formada geyinməsinə bənzədi. Neçə əsr bundan əvvəl Məhsətinin artıq özün üçün müəyyən etdiyin obrazına görə cəmiyyəti ittiham edirsən ki onu belə obrazda vermək olmaz. Niyə olmur? Demək istədiyim odur ki, bu kimi məsələlərdə problemin üzərinə gedib aydınlaşdırmaq lazımdır. Həm də biz orada ümumiyyətlə son vaxtlarda olan boşanma faizinin acınacaqlı rəqəm olduğunu diqqətə çatdırmaq istədik. Buna daha çox diqqət yönəlməlidir ki, boşanmalar azalsın”.

Şəhanə Quliyeva

Tarix: 3 Mart 2026, 18:50

Xəbər lenti