Bakıda qayçı ilə ata və oğula xəsarət yetirən şəxsə AĞIR CƏZA

Bakı Apellyasiya Məhkəməsində qəsdən sağlamlığa ağır zərər vurmada təqsirləndirilən Xəyyam Babayevin (adı, soyadı şərtidir) barəsindəki hökmdən verilən apellyasiya şikayəti üzrə məhkəmə iclası başa çatıb.

Pravda.az-ın əldə etdiyi məlumata görə, sonuncu keçirilən prosesdə qərar elan olunub.

Qərara əsasən, onun apellyasiya şikayəti təmin edilməyib.

İttihama görə, 10 dekabr 2024-cü il tarixdə saat 20 radələrində paytaxtın Xətai rayonu ərazisində yerləşən 200 nömrəli uşaq bağçasının qarşısında təqsirləndirilən şəxsin qardaşı Dadaş Babayevlə Zamiq Əmirov (hər ikisinin adı, soyadı şərtidir) arasında mübahisə yaranıb. Mübahisə qısa müddətdə dava ilə nəticələnib və bu zaman Zamiq qəsdən vuraraq ona üst dodağın əzilmiş yarası və sol əlin birinci barmağının kəsilmiş xəsarəti yetirilib.

Hadisə barədə məlumat alan tərəflərin qohumları dava yerinə gəliblər. Zərərçəkmiş Malik Əmirov və onun atası Katib Əmirov (hər ikisinin adı, soyadı şərtidir) münaqişəni sakitləşdirmək və dava edən şəxsləri ayırmaq məqsədilə müdaxilə ediblər. Lakin bu zaman Xəyyam Babayev ictimai qaydanı kobud şəkildə pozaraq, cəmiyyətə açıq hörmətsizlik nümayiş etdirən və zor tətbiqi ilə müşayiət olunan hərəkətlərə yol verib.

İstintaqla müəyyən olunub ki, təqsirləndirilən şəxs istintaqla dəqiq müəyyən edilməyən qayçı ilə əvvəlcə Malikə hücum edib. O, zərərçəkmişə döş qəfəsi nahiyəsindən bir dəfə zərbə endirib. Nəticədə Malikdə döş qəfəsinin sol hissəsindən plevra boşluğuna nüfuz edən, sol tərəfli pnevmohemotoraksla müşayiət olunan deşilmiş-kəsilmiş yara, həmçinin qarın boşluğuna nüfuz edən və qaraciyərin zədələnməsi ilə nəticələnən ağır bədən xəsarətləri qeydə alınıb. Ekspertiza həmin xəsarətləri həyat üçün təhlükəli ağır xəsarətlər kimi qiymətləndirib.

Bundan sonra Xəyyam ictimai borcunu yerinə yetirərək davanı ayırmağa çalışan Katibə də qayçı ilə zərbə vurub. Hadisə nəticəsində zərərçəkmiş şəxsin sağ əlinin dördüncü barmağında kəsilmiş yara əmələ gəlib ki, bu da sağlamlığın qısa müddətə pozulmasına səbəb olan yüngül xəsarət hesab edilib. Eyni zamanda ona döş qəfəsinin sol hissəsindən plevra boşluğuna nüfuz edən və sol tərəfli pnevmotoraksla nəticələnən, həyat üçün təhlükəli ağır bədən xəsarəti yetirildiyi müəyyən edilib.

Məhkəmə araşdırması zamanı təqsirləndirilən şəxsin hərəkətləri qərəzli xuliqanlıq kimi qiymətləndirilib.

Bakı Ağır Cinayətlər Məhkəməsinin hökmü ilə Xəyyam Babayevə 7 il müddətinə azadlıqdan məhrumetmə cəzasına məhkum edilib. Hökmdən narazı qalan məhkum apellyasiya şikayəti verərək işə yenidən baxılmasını və barəsində ədalətli qərar qəbul olunmasını xahiş edib.

Kamal Məmmədov

Tarix: 4 Mart 2026, 08:32

Xəbər lenti