Samir Vəliyev: "Fransa ölkəmizə qarşı qərəzli mövqeyini yumşaldıb, münasibətlərimizin normal məcrada inkişaf etməsini istəyir"

“Müasir dövrdə dünya siyasətində çox ciddi geostrateji dəyişikliklər baş verir. Məhz bu dəyişikliklər və digər proseslərin fonunda beynəlxalq münasibətlər sistemi olduqca mürəkkəb xarakterə malikdir. Yeni geostrateji şəraitdə milli dövlətlərin beynəlxalq münasibətlər sistemində yeri və rolu məhz həyata keçirilən xarici siyasət kursunun səmərəliliyindən asılıdır. Praqmatik xarici siyasət kursu milli maraqları təmin etməklə yanaşı, ölkələrin qarşısında yeni perspektivlərin yaranmasını da şərtləndirir. Bu kontekstdə müasir beynəlxalq münasibətlər sisteminin müstəqil aktoru və Cənubi Qafqaz regionunun lider dövləti olan Azərbaycanın təcrübəsi unikal, mütərəqqi nümunə kimi çıxış edir. Bu gün Azərbaycan nəinki regionda, bütün dünyada nüfuzlu dövlət kimi qəbul olunur. Son vaxtlar İran ətrafında baş verən proseslərlə bağlı müxtəlif ölkələrin Azərbaycanla sıx təmaslar qurması da bunun göstəricisidir. Təsadüfi deyil ki, bir sıra ölkələrin liderləri Prezident İlham Əliyevə zəng edərək Azərbaycana dəstək ifadə edir, eləcə də vətəndaşlarının ölkəmiz vasitəsilə təxliyəsinə görə təşəkkürlərini bildirirlər. Fransa Prezidenti Emmanuel Makronun da Azərbaycan Prezidenti İlham Əliyevə zəng etməsi bu baxımdan xüsusi vurğulanmalıdır".

Bu sözləri Pravda.az-a açıqlamasında Milli Məclisin deputatı Samir Vəliyev deyib.

"Fransa Prezidenti İranın Azərbaycana hava hücumu ilə əlaqədar ölkəsinin Azərbaycanla həmrəyliyini və dəstəyini ifadə edib. Emmanuel Makron həmçinin İrandakı Fransa vətəndaşlarının Azərbaycan vasitəsilə təxliyəsinə yaradılmış şəraitə görə dövlətimizin başçısına minnətdarlığını bildirib. Telefon söhbəti əsnasında Cənubi Qafqaz regionunda sülhün möhkəmləndirilməsi və Azərbaycan-Fransa ikitərəfli münasibətlərinin yenidən canlandırılması ilə bağlı fikir mübadiləsi aparılıb, əməkdaşlığın perspektivləri ilə bağlı məsələlər müzakirə olunub. Makron bununla bağlı sosial media hesablarında Azərbaycan dilində paylaşım da edib. Fransa uzun müddət ermənipərəst mövqe sərgiləyib, bu ölkənin parlamenti Azərbaycana qarşı qərəzli sənədlər qəbul edib. Rəsmi Paris beynəlxalq miqyasda da ölkəmizin nüfuzuna zərbə vurmaq üçün cəhdlər edib. Lakin bütün bunlara dövlətimiz, Prezidentimiz qətiyyətlə cavab verib. E.Makronun hazırkı yanaşması isə göstərir ki, artıq Fransa ölkəmizə qarşı qərəzli mövqeyini yumşaldıb, münasibətlərimizin normal məcrada inkişaf etməsini istəyir. Çünki Azərbaycanın möqveyi ədalətə və beynəlxalq hüquqa əsaslanır. Ümid edirik ki, bundan sonra rəsmi Paris Azərbaycanla xoş, bərabərhüquqlu və beynəlxalq hüquqa əsaslanan əməkdaşlığa üstünlük verəcək”, - deputat vurğulayıb.

Aytəkin Qardaşova

Tarix: 10 Mart 2026, 12:51

Xəbər lenti