Məhkəmə zalında azadlığa buraxılan şəxs yenidən həbs edildi - QƏRAR

Bakı Apellyasiya Məhkəməsində qəsdən sağlamlığa ağır zərər vurmada təqsirləndirilən İdrak Hüseynovun (adı, soyadı şərtidir) barəsindəki hökmdən dövlət ittihamçısı tərəfindən verilən apellyasiya protesti üzrə məhkəmə prosesi başa çatıb.

Pravda.az-ın əldə etdiyi məlumata görə, hakim Habil Məmmədovun sədrliyi ilə keçirilən prosesdə qərar elan edilib.

Qərara əsasən, apellyasiya protesti qismən təmin edilib, Bakı Ağır Cinayətlər Məhkəməsinin hökmü ləğv edilib, təqsirləndirilən şəxs Cinayət Məcəlləsinin 126.2.4 və 221.2.1-ci maddələrində nəzərdə tutulan cinayət əməlini törətməkdə təqsirli bilinib, ona 5 il 1 ay 16 gün müddətinə azadlıqdan məhrumetmə cəzası təyin olunub. İdrak Hüseynov məhkəmə iclas zalında dərhal həbsə alınıb.

İttihama görə, hadisə 05 dekabr 2023-cü il tarixdə gecə saat 01 radələrində Bakı şəhəri, Binəqədi rayonu, Xocəsən qəsəbəsində yerləşən “Şollar” adlanan kafedə baş verib.

Belə ki, Samir Yusifli şəxsiyyəti istintaqla müəyyən edilməmiş “Aydın” adlı şəxslə birlikdə kafenin daxilində çoxsaylı müştərilərin olduğu vaxt ictimai qaydanı kobud şəkildə pozaraq qalmaqal yaradıb. İstintaqın müəyyən etdiyi hallara görə, o, özünü başqalarından üstün və müstəsna şəxsiyyət kimi göstərmək məqsədilə cəmiyyətin qəbul etdiyi davranış və birgəyaşayış qaydalarına açıq hörmətsizlik nümayiş etdirib.

Hadisə zamanı Samir Yusifli həmin kafedə müştəri qismində olan zərərçəkmiş Taryel Quliyevin (adı, soyadı şərtidir) sifət nahiyəsinə yumruqla zərbələr endirib. Bundan sonra tərəflər arasında mübahisə daha da gərginləşərək dava-dalaşa çevrilib.

Dava zamanı zərərçəkmiş Taryellə birlikdə kafedə istirahət edən digər şəxs – zərərçəkmiş Seymur İbrahimov (adı, soyadı şərtidir) da hadisəyə müdaxilə edib. Bu zaman Samir Yusifli üzərində olan bıçaqla Seymurun qarın nahiyəsinə bir dəfə zərbə vuraraq bədən xəsarəti yetirib. Tibbi ekspertizanın rəyinə əsasən, qarın boşluğunda təxminən 200 millilitr qan yığılması qeydə alınıb və bu xəsarət həyat üçün təhlükəli olan ağır bədən xəsarəti kimi qiymətləndirilib.

Cinayət işi üzrə ibtidai istintaq orqanı Samir Yusiflinin əməlini Cinayət Məcəlləsinin 126.2.4-cü (qəsdən sağlamlığa ağır zərər vurma) və 221.3-cü (xuliqanlıq) maddələri ilə tövsif edib. Lakin işə baxan birinci instansiya məhkəməsi əməli daha yüngül hüquqi tövsiflə qiymətləndirərək onun hərəkətlərini Cinayət Məcəlləsinin 126.1-ci və 221.2.1-ci maddələri ilə tövsif edib və Samir həmin maddələr üzrə təqsirli bilib.

Bakı Ağır Cinayətlər Məhkəməsinin hökmü ilə Samir Yusifliyə şərti cəza təyin olunmuş və onun dərhal məhkəmə iclas zalından azad edilməsi qərara alınmışdı.

Kamal Məmmədov

Tarix: 13 Mart 2026, 09:25

Xəbər lenti