BURADA REKLAMINIZ OLA
BİLƏR

Aydın Əliyev: “Əvvəlcə öz həkimlərimiz işlə təmin edilsin, çatışmazlıq olarsa, xaricdən dəvət etsinlər”

“İllərdir, yerli həkimlərin işlə təmini məsələsini deyirik, ancaq bu problemlərə çarə edilmir. Əlbəttə, dünyanın hər yerində belədir ki, birinci növbədə milli kadrlara fikir verilməlidir”.

 

Bu sözləri Pravda.az-a açıqlamasında həkim radioloq Aydın Əliyev deputat Azər Badamovun qonşu ölkələrdən gələn həkimlərin işlə təminində yaranan problemlərlə bağlı çıxışına münasibət bildirərkən deyib.

 

Onun sözlərinə görə, ilk olaraq Azərbaycandakı həkimlər işlə təmin edilməlidir: “Bütün həkimlərimiz işlə təmin ediləndən sonra çatışmazlıq olarsa, o zaman xaricdən dəvət etsinlər, işlə də təmin etsinlər. Ancaq öz kadrlarımızı yerləşdirməmiş onlara iş verilməsi… Xaricdən gələn həkimlər yerli həkimlərə verilən məvacib müqabilində işləmirlər, onlara daha çox pul ödənilir. Hansısa özəl klinika dəvət edir, məvacibini qarşılayırsa, bu, başqa məsələ. Ancaq dövlət səviyyəsində birinci yerli kadrlara üstünlük verilməlidir. Yerli kadrların təkmilləşməsi üçün işlər görülməlidir. Necə deyərlər, əvvəl evin içi, daha sonra çölü...”

 

Xatırlatma: Milli Məclisin “Azərbaycan Respublikası Nazirlər Kabinetinin 2025-ci ildə fəaliyyəti haqqında hesabatı”nın müzakirəsi zamanı deputat Azər Badamovun “Azərbaycana qonşu ölkələrdən pənah gətirmiş yüzlərlə həkim ordinatura ilə bağlı işlə təmin olunmaqda problem yaşayır. Bir tərəfdən Azərbaycanda həkim çatışmazlığı var, digər tərəfdən isə hazır gəlmiş peşəkar həkimlər işlə təmin oluna bilmirlər. Təklif edirəm ki, burada xüsusi humanist yanaşma tətbiq edilərək həmin həkimlərin peşə ixtisasına yiyələnmə səviyyəsi imtahanla yoxlanılsın və diplomları tanınsın” çıxışı müzakirələrə səbəb olmuşdu.

 

Şəhanə Quliyeva

Tarix: 17 Mart 2026, 12:16   
Xəbər lenti
Çox oxunanlar

Ən son xəbərləri səhifəmizdən də izləyin