Kafedə iki nəfəri bıçaqlayan şəxsə AĞIR CƏZA

Bakı Ağır Cinayətlər Məhkəməsində qəsdən sağlamlığa ağır zərər vurmada və xuliqanlıqda təqsirləndirilən Taleh Zəlimxanovun (soyadı şərtidir) cinayət işi üzrə məhkəmə iclası keçirilib.

Pravda.az-ın əldə etdiyi məlumata görə, hakim Fəxri Məmmədovun sədrliyi ilə keçirilən prosesdə hökm oxunub.

Məhkəmənin hökmü ilə ona 8 il 6 ay müddətinə azadlıqdan məhrumetmə cəzası təyin edilib.

İttihama görə, hadisə 14 sentyabr 2024-cü il tarixdə saat 24 radələrində Bakı-Şamaxı avtomobil yolunun Qaradağ rayonu, Müşfiqabad qəsəbəsi ərazisindən keçən hissəsində, körpünün yaxınlığında yerləşən “Körpü” kafesində baş verib.

Belə ki, Taleh Zəlimxanov sərxoş vəziyyətdə həmin kafeyə gələrək müştəri qismində əyləşib, əvvəllər tanımadığı zərərçəkmiş Rafiq Səfərova (soyadı şərtidir) yaxınlaşıb heç bir əsaslı səbəb olmadan mübahisə yaradıb. Daha sonra o, zərərçəkmiş şəxsi kafedən kənara çıxarıb və ictimai qaydanı kobud şəkildə pozaraq, cəmiyyətə açıq hörmətsizlik nümayiş etdirən hərəkətlərə yol verib.

İttihamda göstərilir ki, o, kafenin giriş qapısı qarşısında zərərçəkmiş şəxsə qəfil hücum edərək yumruqla sifət nahiyəsinə zərbə endirib.

Hadisə yerindən uzaqlaşmaq istəyən Taleh arxasınca Rafiq və onun tanışları gedərək baş vermiş insidentin səbəbini aydınlaşdırmaq istədikdə isə o, xuliqanlıq hərəkətlərini davam etdirib.

Belə ki, Taleh üzərində gəzdirdiyi bıçaqdan silah qismində istifadə edərək Rafiqə hücum edib və qəsdən onun döş qəfəsinə bir zərbə vurub. Nəticədə zərərçəkmiş şəxsin döş qəfəsinin sol yarısında döş boşluğuna nüfuz edən, diafraqmanı zədələyən deşilmiş-kəsilmiş yara əmələ gəlib.

Məhkəmə-tibbi ekspertizasının rəyinə əsasən, həmin xəsarət həyat üçün təhlükəli olan ağır bədən xəsarəti kimi qiymətləndirilib.

Bundan başqa, yaranmış münaqişəyə müdaxilə edərək ictimai qaydanın pozulmasının qarşısını almağa çalışan digər şəxs – Səxavət Məlikov (soyadı şərtidir) da təqsirləndirilən şəxsin hücumuna məruz qalıb. Belə ki, Taleh həmin şəxsi bıçaqla qarın nahiyəsindən vuraraq qarın boşluğuna nüfuz etməyən deşilmiş-kəsilmiş yara yetirib.

Beləliklə, Taleh Zəlimxanov hərəkətləri ictimai qaydanı kobud surətdə pozan, cəmiyyətə açıq hörmətsizlik ifadə edən və zor tətbiqi ilə müşayiət olunan qərəzli hərəkətlər kimi – xuliqanlıq və qəsdən sağlamlığa ağır zərər vurma kimi tövsif edilib.

Məhkəmə istintaqı zamanı Taleh Zəlimxanov ona elan olunmuş ittiham üzrə özünü qismən təqsirli bildiyini deyib. O, ifadəsində hadisəni tam xatırlamadığını, həmin vaxt sərxoş vəziyyətdə olduğu üçün öz hərəkətlərinə nəzarət edə bilmədiyini söyləyib.

Təqsirləndirilən şəxs qeyd edib ki, zərərçəkmiş şəxsləri əvvəlcədən tanımayıb və onlarla heç bir şəxsi münasibəti olmayıb.

O, ümumilikdə iki nəfəri bıçaqla vurduğunu etiraf edib və törətdiyi əməldən peşman olduğunu bildirib.

Kamal Məmmədov

Tarix: 18 Mart 2026, 08:20

Xəbər lenti