Qadınları fahişəliyə cəlb edən şəxsə hökm oxundu

Yasamal Rayon Məhkəməsində fahişəliyə cəlb etmədə təqsirləndirilən Ceyla Səmədovanın (adı, soyadı şərtidir) cinayət işi üzrə məhkəmə istintaqı başa çatıb.

Pravda.az-ın əldə etdiyi məlumata görə, hakim Rəşad Cavadzadənin sədrliyi ilə keçirilən prosesdə hökm oxunub.

Məhkəmənin hökmü ilə ona 3 500 manat miqdarında cərimə cəzası təyin edilib.

İttihama görə, Ceyla Səmədova müxtəlif vaxtlarda maddi gəlir əldə etmək məqsədi ilə bir neçə qadını kişi müştərilərlə pul müqabilində cinsi əlaqəyə cəlb edərək bu prosesi təşkil edib və bundan qazanc əldə edib.

Belə ki, o, 2020-ci ilin yanvar ayının əvvəllərində yaşayış paytaxtın Yasamal rayonu ərazisində zərərçəkmiş S.S. (adı, soyadı şərtidir) ilə danışaraq onu tanışı olan kişi müştərilərlə görüşdürüb. Araşdırmalarla müəyyən edilib ki, təqsirləndirilən şəxs hər görüşdən maddi qazanc əldə etmək məqsədilə zərərçəkmiş şəxsin 1000 manat müqabilində cinsi əlaqəyə razılıq verməsini təşkil edib və bununla da özü üçün 500 manat gəlir əldə edib.

İstintaqa görə, həmin dövrdən başlayaraq 2023-cü ilin dekabr ayınadək olan müddət ərzində S.S.-i təxminən 15-17 dəfə müxtəlif kişi müştərilərlə Bakı şəhəri ərazisində yerləşən müxtəlif otellərdə görüşdürülərək fahişəliyə cəlb olunub.

Bundan başqa, Ceyla 2022-ci ilin iyul ayının sonlarında Bakı şəhəri, Yasamal rayonu ərazisində yaşayan digər bir qadınla - zərərçəkmiş D.D. (adı, soyadı şərtidir) ilə də eyni qaydada razılıq əldə edib. Belə ki, o, zərərçəkmiş şəxsi kişi müştərilərlə pul müqabilində cinsi əlaqəyə cəlb edərək hər görüşdən gəlir əldə edib.

Araşdırmalarla müəyyən edilib ki, 2022-ci ilin iyul ayının sonlarından 2023-cü ilin iyul ayının əvvəllərinədək olan müddətdə D.D.-ni təxminən 5-10 dəfə müxtəlif kişi müştərilərlə Bakı şəhərində yerləşən müxtəlif otellərdə görüşdürülərək fahişəliyə cəlb olunub.

İstintaq materiallarına əsasən, təqsirləndirilən şəxs 2023-cü ilin noyabr ayının sonlarında digər bir qadın – zərərçəkmiş T.T. (adı, soyadı şərtidir) ilə də eyni məqsədlə əlaqə saxlayıb. O, həmin şəxsin 500 manat müqabilində kişi müştəri ilə görüşməsini təşkil edib və özü üçün 200 manat gəlir əldə edib. Bu epizod üzrə T.T.-ni bir dəfə müştəri ilə görüşdürüb.

Bundan əlavə, Ceyla 2023-cü ilin may ayının əvvəllərində Bakı şəhəri, Yasamal rayonu ərazisində yaşayan zərərçəkmiş F.F. (adı, soyadı şərtidri) ilə də danışaraq onu kişi müştərilərlə pul müqabilində cinsi əlaqəyə cəlb edib. İstintaqla müəyyən olunub ki, 2023-cü ilin may ayından 2024-cü ilin avqust ayınadək olan müddətdə zərərçəkmiş şəxsi təxminən 8-10 dəfə müxtəlif kişi müştərilərlə görüşdürülərək fahişəliyə cəlb olunub.

Toplanmış sübutlarla təqsirləndirilən şəxsin bu əməlləri təkrarən və tamah niyyəti ilə törətdiyi, hər bir epizod üzrə maddi gəlir əldə etdiyi müəyyən edilib.

Qeyd olunan faktlara görə, Ceyla Səmədovanın əməli Cinayət Məcəlləsinin 243.1-ci (Fahişəliyə cəlb etmə) maddəsi ilə, yəni fahişəliyə cəlbetmə kimi tövsif olunub.

Kamal Məmmədov

Tarix: 6 Aprel 2026, 09:22

Xəbər lenti