Qanunsuz tikinti işləri aparan sahibkara hökm oxundu

Mingəçevir Şəhər Məhkəməsində müvafiq icazə almadan mühafizə zonalarında tikinti və ya quraşdırma işləri aparmada və torpaq üzərində mülkiyyət, istifadə və ya icarə hüququnu pozmada təqsirləndirilən Alı Səfərovun (adı, soyadı şərtidir) cinayət işi üzrə məhkəmə istintaqı başa çatıb.

Pravda.az-ın əldə etdiyi məlumata görə, hakim Nemət Paşayevin sədrliyi ilə keçirilən prosesdə hökm oxunub.

Məhkəmənin hökmü ilə Cinayət Məcəlləsinin 188.1, 188.2 və 222-2.1-ci maddələri ilə təqsirləndirilən Alı Səfərov “Konstitusiya və Suverenlik İli” münasibətilə amnistiya elan edilməsi haqqında” Milli Məclisin Qərarının 1.16 və 5.1-ci bəndlərinə əsasən onun barəsində cinayət təqibinə xitam verilib. Təqsirləndirilən şəxsin Cinayət Məcəlləsinin 188.1, 188.2 və 222-2.1-ci maddələri ilə təqsirləndirilməsinə dair cinayət işinin icraatına xitam verilib. Onun barəsində seçilmiş başqa yerə getməmək haqqında iltizam qətimkan tədbiri ləğv olunub.

İş materiallarına görə, Alı Səfərov Torpaq Məcəlləsinin 66-68-ci maddələrinin tələblərini pozaraq torpaq sahələri üzərində hüquqların yalnız müvafiq icra hakimiyyəti orqanlarının və bələdiyyələrin qərarları, eləcə də tərəflər arasında bağlanmış müqavilə əsasında və dövlət reyestrində qeydiyyatdan keçdikdən sonra yarandığını bildiyi halda, bu tələblərə əməl etməyib.

Belə ki, o, Mingəçevir şəhəri, 1-ci İxtiyar Qasımov döngəsi, 70B ünvanında mülkiyyətində olan 0,12 hektar torpaq sahəsinin hüdudlarından kənara çıxaraq, əlavə olaraq Mingəçevir bələdiyyəsinin mülkiyyətində olan 0,097 hektar və “Kür” çayının mühafizə zonasına daxil olan dövlət mülkiyyətindəki 0,053 hektar torpaq sahəsini – ümumilikdə 0,15 hektar ərazini 2024-cü ildən başlayaraq özbaşına tutub və istifadə edib.

Araşdırmalarla müəyyən edilib ki, təqsirləndirilən şəxs həmin ərazilərdə müxtəlif dekorativ ağac və bitkilər əkərək faktiki istifadəni davam etdirib.

İstintaq zamanı o da məlum olub ki, Alı Səfərov Şəhərsalma və Tikinti Məcəlləsinin 80.4-cü maddəsinin tələblərini pozaraq müvafiq icra hakimiyyəti orqanına məlumat vermədən və layihə sənədlərini təqdim etmədən tikinti işləri həyata keçirib.

Belə ki, bələdiyyə mülkiyyətində olan torpaq sahəsində mişar daşı və metal materiallardan istifadə etməklə hasar çəkib, 88,5 kvadratmetr sahədə metal konstruksiyalı “manqalxana”, həmçinin iki ədəd 4,5 kvadratmetr sahədə pilləkən inşa edib.

Bundan başqa, dövlət mülkiyyətində olan torpaq sahəsində 12,6 və 14 kvadratmetr sahədə bərəyə keçid yolu, eləcə də 4,5 kvadratmetr sahədə pilləkən tikdiyi müəyyən edilib.

Araşdırma ilə müəyyən olunub ki, təqsirləndirilən şəxs “Kür” çayının mühafizə zonasında da qanunsuz tikinti və quraşdırma işləri aparıb.

Belə ki, müvafiq icazə və razılaşdırılmış layihə sənədləri olmadan həmin ərazidə hasar inşa edib, eləcə də çayın yatağında suyun üzərində ölçüləri 9x8 metr olan iki ədəd metal konstruksiyalı bərə (söhbətgah) quraşdırıb.

Nəticədə o, su mühafizə zonalarının istifadəsi qaydalarını kobud şəkildə pozub.

Kamal Məmmədov

Tarix: 7 Aprel 2026, 09:22

Xəbər lenti