Rayondan Bakıya iş axtarmaq məqsədilə gələn şəxs kafedən oğurluq etdi - HÖKM

Binəqədi Rayon Məhkəməsində oğurluqda təqsirləndirilən Qabil Binnətovun (adı, soyadı şərtidir) cinayət işi üzrə məhkəmə istintaqı yekunlaşıb.

Pravda.az-ın əldə etdiyi məlumata görə, hakim Vüsal Tağıyevin sədrliyi ilə keçirilən prosesdə hökm oxunub.

Məhkəmənin hökmü ilə o, 1 il 10 ay 28 gün müddətə azadlığın məhdudlaşdırılması (elektron qolbaq) cəzası təyin edilib və təqsirləndirilən şəxs dərhal məhkəmə zalından həbsdən azad olunub.

İttihama görə, Şirvan rayon sakini Qabil Binnətov tamah niyyəti ilə özgənin əmlakını gizli yolla ələ keçirmək məqsədilə 2025-ci ildə, səhər saatlarında paytaxın Binəqədi rayonu ərazisində yerləşən “Qarabağ” kafesinin həyətində oğurluq hadisəsi törədib.

Belə ki, o, kafedə masanın üzərində olan zərərçəkmiş Fərid Hacıyevə (adı, soyadı şərtidir) məxsus “iPhone 16 Pro” markalı mobil telefonu, həmçinin daxilində olan mobil nömrə ilə birlikdə gizli şəkildə götürərək hadisə yerindən uzaqlaşıb. Nəticədə zərərçəkmiş şəxsə ümumilikdə 3 049 manat məbləğində maddi ziyan vurulub.

Məhkəmə baxışı zamanı Qabil Binnətov ona qarşı irəli sürülmüş ittiham üzrə özünü tam təqsirli bilib. O, ifadəsində deyib ki, hadisədən əvvəl iş axtarmaq məqsədilə Bakı şəhərinə gəlib və müxtəlif kafelərə müraciət edib. Təqsirləndirilən şəxs hadisə zamanı spirtli içkinin təsiri altında olduğunu qeyd edib.

Onun sözlərinə görə, əvvəlcə Biləcəri qəsəbəsində yerləşən kafelərdən birində spirtli içki qəbul edib, daha sonra isə hadisənin baş verdiyi kafeyə gəlib. Orada özünü kababçı kimi təqdim edərək iş və qalacaq yer axtardığını bildirib. Lakin təklif olunan şərtlərlə razılaşmayıb.

Qabil söyləyib ki, həmin vaxt kafeyə gələn digər şəxslə zərərçəkmiş Fərid söhbət edərək çölə çıxıb. Bundan istifadə edən təqsirləndirilən şəxs sərxoş vəziyyətdə masanın üzərində olan mobil telefonu götürərək kafedən çıxıb.

O, daha sonra “DSK yolu” adlanan əraziyə gedərək mobil telefonu satmaq məqsədilə telefon dükanına daxil olub. Satıcı telefonun şifrəsini soruşduqda onu bilmədiyini desə də, cihazın oğurluq olduğunu gizlədib. Nəticədə telefonu ehtiyat hissəsi kimi sataraq əvəzində 50 manat pul və işlənmiş mobil telefon əldə edib.

Qabil məhkəmədə törətdiyi əməldən peşman olduğunu bildirib, həmçinin zərərçəkmiş şəxsə dəymiş maddi ziyanın ödənildiyini və tərəflər arasında barışıq əldə olunduğunu qeyd edib.

Məhkəmə istintaqı zamanı araşdırılmış sübutlar əsasında təqsirləndirilən şəxsin Cinayət Məcəlləsinin 177.1-ci (oğurluq) maddəsində nəzərdə tutulmuş oğurluq cinayətini törətməsi tam sübuta yetirilib.

Kamal Məmmədov

Kamal Məmmədov

Tarix: 9 Aprel 2026, 08:51

Xəbər lenti