Parkda tanışının burnunu sındıran keçmiş məhkum amnistiyaya düşdü

Nəsimi Rayon Məhkəməsində xuliqanlıqda təqsirləndirilən Baba Balayevin (adı, soyadı şərtidir) cinayət işi üzrə məhkəmə istintaqı yekunlaşıb.

Pravda.az-ın əldə etdiyi məlumata görə, hakim Elməddin Hüseynovun sədrliyi ilə keçirilən prosesdə hökm oxunub.

Məhkəmənin hökmü ilə “Konstitusiya və Suverenlik İli münasibətilə amnistiya elan edilməsi haqqında” Milli Məclisin 19 dekabr 2025-ci il tarixli Qərarı tətbiq edilməklə təqsirləndirilən şəxs Cinayət Məcəlləsinin 221.1-ci maddəsi ilə cinayət məsuliyyətindən azad edilsib və iş üzrə icraata xitam verilib. Baba Balayev barəsində seçilmiş başqa yerə getməmək haqqında iltizam qətimkan tədbiri ləğv olunub.

İttihama görə, hadisə 21 fevral 2025-ci il tarixdə saat 15 radələrində paytaxtın Nəsimi rayonu ərazisində yerləşən “Səməd Vurğun” adına istirahət parkının qarşısındakı avtobus dayanacağında baş verib.

Belə ki, təqsirləndirilən şəxs ictimai yerdə heç bir əsaslı səbəb olmadan tanışı ilə mübahisə etməyə başlayıb.

Araşdırmalarla müəyyən edilib ki, Baba Balayev ətrafda olan digər şəxslərin olmasına məhəl qoymadan qarşı tərəfi nalayiq ifadələrlə təhqir edib, bununla da cəmiyyətdə qəbul olunmuş davranış və əxlaq normalarına açıq hörmətsizlik nümayiş etdirərək ictimai qaydanı kobud surətdə pozub. Daha sonra təqsirləndirilən şəxs zərərçəkmiş Fərəc Vəliyevə (adı, soyadı şərtidir) qarşı fiziki zor tətbiq edib, onun bədəninin müxtəlif nahiyələrinə yumruq və təpik zərbələri endirib.

Hadisə nəticəsində zərərçəkmiş şəxsə burun sümüklərinin yerdəyişməyən sınığı ilə müşayiət olunan burun nahiyəsinin qançır və şişkinliyi, əzilmiş yara, sağ almacıq nahiyəsində və sağ əlin beşinci barmağında sıyrıqlar, həmçinin sol bud nahiyəsində dərialtı hematoma kimi xəsarətlər yetirilib.

Məhkəmə-tibbi ekspertiza rəyi ilə həmin xəsarətlərin sağlamlığın qısa müddətə pozulmasına səbəb olan yüngül zərər vurmaya aid olduğu müəyyən edilib.

Məhkəmə istintaqı zamanı Baba Balayev ifadəsində bildirib ki, qeyri-rəsmi şəkildə fəhləliklə məşğul olub. Onun sözlərinə görə, əvvəllər quldurluq cinayətinə görə məhkum olunub və 02 iyun 2022-ci il tarixdə vaxtından əvvəl şərti azadlığa buraxılıb. Azadlığa çıxdıqdan sonra rəsmi iş yeri olmayıb və müxtəlif işlərdə çalışaraq dolanışığını təmin edib.

O, zərərçəkmiş şəxsi tanıdığını, lakin aralarında əvvəllər hər hansı düşmənçilik və ya ədavət olmadığını qeyd edib.

İttihamda göstərilir ki, təqsirləndirilən şəxs bu hərəkətləri ilə ictimai qaydanı kobud şəkildə pozaraq, zor tətbiqi ilə müşayiət olunan qərəzli xuliqanlıq əməli törədib.

Kamal Məmmədov

Tarix: 15 Aprel 2026, 08:04

Xəbər lenti