Qəzadan sonra yerimə qabiliyyətini itirən müğənni Ayla: “Ətrafımda dolanan insanların heç biri indi yoxdur”

“O maşından 7 nəfərin sağ çıxması özü bir möcüzədir. Maşın məni 30 metr məsafəyə tullayıb. Həkimim dedi ki, sənin bəxtin gətirib ki, boynun qırılmayıb, qırılsaydı, bizim bir faiz belə ümidimiz olmayacaqdı”.

Pravda.az xəbər verir ki, bu sözləri gənc müğənni Ayla Şiriyeva (Aila Rai) Astar Tv-yə danışıb.

Qəzadan sonra yerimə qabiliyyətini itirən müğənni yaşadıqlarından bəhs edib: “Əməliyyatda anama dedilər ki, möcüzə baş verməlidir ki, ayağa qalxa bilim. Reanimasiyada gözümü açan kimi ilk eşitdiyim cümlə bu oldu ki, tibb bacıları danışırdılar ki, “qız müğənnidir, deyiblər ki, heç zaman yeriyə bilməyəcək”. Mən buna inanmaq istəmədim. Bu qədər yer üzündə pis insanlar ayaqda gəzdiyi müddətcə mən niyə yataqda qalmalıyam?! Sağ ayağımda iki barmaq tərpəndiyi üçün fizioterapiya almağım qərarı verildi və bu günə kimi də davam edir. Baxmayaraq ki, yeriməyimlə bağlı mənə pis, mənfi sözlər deyirdilər, amma ilk gündən özümə dedim ki, ayağa qalxmalıyam. Mübarizəni ailəm üçün aparıram. Bəzi insanlar belə hadisələri özlərinə Allahdan gələn cəza kimi qəbul edirlər. Mən isə bunu Allahdan gələn sınaq kimi qəbul edirəm və bu yola peşman deyiləm. Ətrafımda dolanan insanların indi heç biri yoxdur. Amma bilirəm ki, mən ayağa qalxandan sonra onların hamısı yenidən ortaya çıxacaqlar. Zədəm çox böyükdür, onurğa beyni, sinir zədələnib. Mənim həyatda qalmağımın özü möcüzədir. Amma həkimlər heç nə demir. İçimdə nə çəkdiklərimi özümdən başqa kimsə bilmir. Mənə haqsızlıqlar oldu, amma bunu indi danışmaq istəmirəm, əsəbləşmək olmaz. Nə vaxt durub yeriyərəm, vaxtı gələndə onları da danışacam, mütləq ki danışılacaq”.

Şəhanə Quliyeva

Tarix: 22 Aprel 2026, 14:40

Xəbər lenti