Xocalıda tapdığı “Kalaşnikov”u Goranboya aparan şəxslə bağlı QƏRAR

Ali Məhkəmədə qanunsuz olaraq silah, saxlama, daşıma və ya gəzdirmədə təqsirləndirilən G.İsmayılovun barəsindəki qərardan verilən kassasiya şikayəti üzrə məhkəmə iclası başa çatıb.

Pravda.az-ın əldə etdiyi məlumata görə, hakim Zaur Hüseynovun sədrliyi ilə keçirilən prosesdə qərar elan olunub.

Qərara əsasən, kassasiya şikayəti təmin edilməyib.

İttihama görə, G.İsmayılov 2024-cü ildə işğaldan azad olunmuş Xocalı rayonunun Ballıca kəndində yerləşən fərdi yaşayış evində usta kimi təmir işləri apararkən həyətyanı sahədə yerləşən dəmir borunun içərisində gizlədilmiş odlu silah aşkarlayıb. O, tapdığı silahın “Kalaşnikov” konstruksiyalı AKM model avtomatın qanunsuz olduğunu bildiyi halda onu götürərək əl çantasına yerləşdirib və həmin evdə gizlədib. Təqsirləndirilən şəxs silahı iki gün ərzində həmin ünvanda saxladıqdan sonra onu yaşadığı yerə aparmaq qərarına gəlib.

Bu məqsədlə G.İsmayılov bir neçə gün sonra silah yerləşdirilmiş çanta ilə Xankəndi–Ağdam avtomobil yolunun Xocalı rayonu ərazisindən keçən hissəsinə çıxaraq yoldan keçən nəqliyyat vasitəsini saxladıb. İstintaq materiallarına görə, o, əvvəllər tanımadığı sürücünün idarə etdiyi “Ford Transit” markalı avtomobilə minərək ondan onu aparmasını xahiş edib. Sürücü çantada silah olmasından xəbərsiz şəkildə razılıq verib. Təqsirləndirilən şəxs çantanı avtomobilin yük yerinə yerləşdirərək özü sərnişin yerində əyləşib və silahı bu yolla qanunsuz olaraq daşımağa başlayıb. G.İsmayılov silahı yaşadığı Goranboy rayonunun Qaraçinar kəndinə aparmaq niyyətində olub.

Lakin həmin gün axşam saat 20:30 radələrində Goranboy rayonu Xanqərvənd kəndi ərazisində polis əməkdaşları tərəfindən keçirilmiş əməliyyat-axtarış tədbirləri zamanı qeyd olunan nəqliyyat vasitəsi saxlanılıb. Avtomobilə baxış keçirilərkən yük yerində yerləşdirilmiş çantadan bir ədəd odlu yivli silah – avtomat aşkar edilərək götürülüb.

Beləliklə, G.İsmayılov qanunsuz olaraq əldə etdiyi və daşıdığı odlu silah hüquq-mühafizə orqanları tərəfindən aşkar edilərək götürülüb.

Goranboy Rayon Məhkəməsinin hökmü ilə o, 1 il 11 ay 28 gün müddətinə azadlıqdan məhrum edilib. Gəncə Apellyasiya Məhkəməsi G.İsmayılovun apellyasiya şikayətini təmin etməyib.

Qaradağ Rayon Məhkəməsinin qərarına əsasən onun barəsində “Konstitusiya və Suverenlik ili münasibəti ilə amnistiya elan edilməsi haqqında” Milli Məclisin Qərarının 3-cü bəndi tətbiq edilərək, G.İsmayılova təyin edilmiş azadlıqdan məhrumetmə cəzasının çəkilməmiş hissəsi 6 ay azaldılıb.

Gəncə Apellyasiya Məhkəməsinin qərarından məhkum tərəfindən kassasiya şikayəti verilmişdir.

Kamal Məmmədov

Tarix: 5 May 2026, 08:09

Xəbər lenti