Meloninin səfərinin zamanlaması, keçirilən görüşlərdə səmimiyyətin özü bütün suallara cavabdır - RƏY

"İtaliya hökuməti bir tərəfdən ölkənin milli maraqlarını etibarlı şəkildə qoruyacaq, digər tərəfdən isə yeni Avropa məkanının formalaşmasına mümkün qədər töhfə verəcək xarici siyasi kurs həyata keçirir. İtaliya Respublikasının xarici siyasəti üç əsas sahədə həyata keçirilir: Avropa, Atlantik və Aralıq dənizi. XXI əsrin əvvəllərindən Avropa siyasəti İtaliyanın beynəlxalq arenada öz statusunu möhkəmləndirmək üçün bir vasitəyə çevrilmişdirsə, bu gün nümayiş etdirilən aktiv mövqe Avropa məkanının liderləri ilə bir səviyyədə durmağın bir yoludur. XX əsrin ikinci yarısında İtaliyanın xarici siyasət konsepsiyasının əsasını təşkil edən və ölkənin siyasi imicini və beynəlxalq arenadakı mövqeyini müəyyən edən avropaçılıq atlantik istiqamətli yol ilə birlikdə olub. Bu kontekstdə bu gün İtaliya siyasətinin xarici siyasət ölçüsünün ölkədəki daxili siyasi vəziyyətlə sıx bağlı olması xüsusilə vacibdir".

Bu sözləri Pravda.az-a açıqlamasında siyasi elmlər üzrə fəlsəfə doktoru, politoloq Şəbnəm Həsənova deyib.

Politoloq bildirib ki, XXI əsrin əvvəllərində ölkədə miqrasiya problemi və COVID-19 kimi böhran dövrlərindən Avropaya münasibətdə daxildə skeptik partlayışlar da müşahidə olunur:

"Lakin avropaçılıq ölkənin xarici siyasətinin əsas aspekti olaraq qalır. Habelə bunu da vurğulamaq əsasdır ki, Avropa istiqaməti və xarici siyasətin əsas kursu yalnız Avropa İttifaqı sahəsi ilə məhdudlaşmır, həm də Avropa dövlətləri, o cümlədən Aİ üzvü olmayan ölkələrlə ikitərəfli əlaqələri əhatə edir. Bu istiqamətdə Azərbaycan xüsusilə seçilir. İtaliya ilə Azərbaycan əlaqələri etimada söykənir. Yəni iki ölkənin stabil mövqeyi müşahidə olunur. Şübhəsiz ki, İtaliya Respublikası Nazirlər Şurasının sədri Ciorcia Meloninin səfəri həm siyasi, həm də rəmzi əhəmiyyət kəsb edir. Bu səfər bir növ daimi siyasi koordinasiya deməkdir. Meloninin İtaliyanın baş nazirləri statusunda Azərbaycana reallaşdırılmayan on üç illik boşluğu doldurması iki ölkə arasındakı dostluq münasibətlərindən xəbər verir. Həm də Ermənistanda keçirilən tədbir arası Bakıya gəlmək, düşünürəm ki, nümayiş etdirilən mövqedir. Ölkələr arasındakı münasibətlər təkcə kəmiyyət yox, həm də keyfiyyət baxımından inkişaf edir. Meloninin səfəri koordinasiyalı siyasətdən xəbər verirsə, həm də iki ölkə arasındakı münasibətlərin sabitlik dərəcəsini göstərir. Azərbaycanın İtaliya bazarına 9.5 milyard qaz ixracatı hər iki ölkə arasındakı etimadın yüksək olduğunun göstəricisidir. İtaliya və Azərbaycan hərbi-texniki sahədə də əməkdaşlığı inkişaf etdirirlər. Yaxın zamanlarda baş tutacaq Bakı Biznes Forumu iqtisadi tərəqqiyə kömək edəcək. Meloninin Ermənistanda keçirilən tədbirə, həmçinin sıx qrafikə rəğmən Azərbaycana səfər etməsi ölkələrimiz arasındakı əlaqələrin ən yüksək səviyyəsindən xəbər verir. Səfərin zamanlaması, keçirilən görüşlərdə səmimiyyətin özü bütün suallara cavabdır".

Aytəkin Qardaşova