Restoranda ona baxan şəxsi bıçaqlayana cəza verildi

Şəki Ağır Cinayətlər Məhkəməsində xuliqanlıq niyyətilə qəsdən sağlamlığa ağır zərər vurmada və xuliqanlıqda təqsirləndirilən Zamiq Əlizadənin (adı, soyadı şərtidir) cinayət işi üzrə məhkəmə iclası keçirilib.

Pravda.az-ın əldə etdiyi məlumata görə, hakim Xaliq Məmmədovun sədrliyi ilə keçirilən prosesdə hökm oxunub.

Məhkəmənin hökmü ilə ona 3 il müddәtә azadlıqdan mәhrumetmә cәzası tәyin olunub.

İstintaq materiallarına əsasən, təqsirləndirilən şəxs xuliqanlıq niyyəti ilə insan həyatı üçün təhlükəli olan qəsdən sağlamlığa ağır zərər vurmaqda, həmçinin silah qismində istifadə olunan əşyadan istifadə etməklə ictimai qaydanı kobud surətdə pozmaqda ittiham olunur.

İttihama görə, hadisə 2025-ci ildə gecə saatlarında Yevlax rayonunun Qoyunbinəsi kəndi ərazisində yerləşən “Laçın” restoranında baş verib.

Belə ki, Zamiq Əlizadə əvvəlcə tanışı ilə birlikdə restoranın ümumi zalında əyləşərək yemək yeyib və spirtli içki qəbul edib. Daha sonra yüngül dərəcəli alkoqol sərxoşluğu vəziyyətində olan təqsirləndirilən şəxs digər masada əyləşən zərərçəkmiş Malik Həbibova (adı, soyadı şərtidir) baxışlarına görə irad bildirib. Bu səbəbdən tərəflər arasında mübahisə yaranıb. Mübahisə zamanı Zamiq restoranda olan digər şəxslərin gözü qarşısında zərərçəkmiş şəxsin ünvanına nalayiq ifadələr işlədərək onu münaqişəyə cəlb etməyə çalışıb və mübahisəni davam etdirmək məqsədilə Maliki restoranın həyətinə çağırıb.

Zərərçəkmiş şəxs ictimai yer hesab edilən həmin əraziyə çıxdıqdan sonra Zamiq davranışlarını davam etdirərək heç bir əsaslı səbəb olmadan ucadan nalayiq söyüşlər söyməklə ictimai qaydalara açıq etinasızlıq nümayiş etdirib, ətrafdakı şəxslərə qarşı hörmətsizlik göstərib və özünü digərlərindən üstün tutmağa çalışıb. Bu zaman o, üzərində olan və istintaqa məlum olmayan deşici-kəsici alətdən – bıçaqdan istifadə edərək zərərçəkmiş şəxsə hücum edib. Təqsirləndirilən şəxs xuliqanlıq niyyəti ilə Malikin sağ qarın nahiyəsinə bir dəfə qəsdən zərbə endirib.

Nəticədə zərərçəkmiş şəxs qarının ön divarına nüfuz edən, böyük piyliyin zədələnməsi və daxili qanaxma ilə müşayiət olunan deşilmiş-kəsilmiş yara xəsarəti alıb. Ekspertiza rəyinə əsasən, həmin xəsarət insan həyatı üçün təhlükəli olan və sağlamlığa ağır zərər kimi qiymətləndirilir.

Beləliklə, Zamiq hərəkətləri ictimai qaydanı kobud şəkildə pozmaqla, cəmiyyətə açıq hörmətsizlik nümayiş etdirməklə və zor tətbiqi ilə müşayiət olunan qərəzli xuliqanlıq, eləcə də xuliqanlıq niyyəti ilə qəsdən sağlamlığa ağır zərər vurma kimi tövsif olunub.

Kamal Məmmədov

Tarix: 8 May 2026, 08:12

Xəbər lenti