BURADA REKLAMINIZ OLA
BİLƏR

Keçmiş iş yoldaşını 170 manat borc pula görə bıçaqlayan şəxslə bağlı QƏRAR

Bakı Apellyasiya Məhkəməsində qəsdən sağlamlığa ağır zərər vurmada təqsirləndirilən İsgəndər Əsgərovun barəsindəki hökmdən verilən apellyasiya şikayəti üzrə məhkəmə prosesi başa çatıb.

 

Pravda.az-ın əldə etdiyi məlumata görə, hakim Zamin İbrahimovun sədrliyi ilə keçirilən prosesdə qərar elan edilib.

 

Qərara əsasən, apellyasiya şikayəti təmin edilməyib.

 

İttihama görə, İsgəndər Əsgərov 2025-ci il Bakı şəhəri, Suraxanı rayonu, H.Əliyev prospektində yerləşən “Ağ çiçəyim” gül mağazasının yaxınlığında tanışı, əvvəllər tikinti sahəsində birlikdə işlədiyi zərərçəkmiş Rauf Rəfiliyə (adı, soyadı şərtidir) bıçaqla xəsarətlər yetirib.

 

İş materiallarına əsasən, tərəflər arasında mübahisəyə səbəb 170 manat məbləğində pul borcu olub. Belə ki, İsgəndər həmin məbləği Raufdan dəfələrlə tələb etsə də, sonuncu pulu verməkdən imtina edib. Bu səbəbdən aralarında mübahisə yaranıb. Mübahisə zamanı təqsirləndirilən şəxs istintaqa məlum olmayan bıçaqla qəsdən üç dəfə zərbə endirib. Nəticədə Raufa döş qəfəsi nahiyəsinin sol-yan səthində və döş qəfəsinin arxa səthinin sol yarısında daxilə – sol plevra boşluğuna nüfuz edən, sol ağciyərin aşağı payının kəsilmiş-deşilmiş yarası və sol tərəfli hemopnevmotoraksla müşayiət olunan iki ədəd deşilmiş-kəsilmiş yara yetirilib.

 

Məhkəmə-tibbi ekspertizasının rəyinə əsasən, həmin xəsarətlər həm ümumilikdə, həm də ayrı-ayrılıqda sağlamlığın uzun müddətə pozulmasına səbəb olan və insan həyatı üçün təhlükəli hesab edilən sağlamlığa ağır zərər kimi qiymətləndirilib. Bundan əlavə, zərərçəkmiş şəxsə qarın nahiyəsinin ön divarından daxilə – qarın boşluğuna nüfuz etməyən bir ədəd deşilmiş-kəsilmiş yara da yetirilib. Həmin xəsarət sağlamlığın qısa müddətə pozulmasına səbəb olan yüngül zərər kimi dəyərləndirilib.

 

Bakı Ağır Cinayətlər Məhkəməsinin hökmü ilə İsgəndər Əsgərov 5 il müddətə azadlıqdan məhrum edilib.

 

Kamal Məmmədov

Tarix: 8 May 2026, 09:10   
Xəbər lenti
Çox oxunanlar

Ən son xəbərləri səhifəmizdən də izləyin