Cavanşir Paşazadə: “Esvatini Kralının milli geyiminə görə tənqid edilməsi yolverilməzdir, cılız fikirlərlə çıxışlar edirlər...”

Azərbaycan-Cənubi Afrika Respublikası parlamentlərarası işçi qrupunun üzvü Cavanşir Paşazadə BMT-nin Ümumdünya Şəhərsalma Forumunun 13-cü Sessiyası (WUF13) çərçivəsində milli geyimdə Bakıya gələn Esvatini Krallığının Kralı Əlahəzrət III Msvati ilə bağlı müzakirələrə münasibət bildirib.

C.Paşazadə Pravda.az-a açıqlamasında deyib ki, hər hansı ölkənin milli geyimin tənqid olunması yolverilməzdir.

Deputat bildirib ki, Azərbaycan böyük və nüfuzlu beynəlxalq tədbirə ev sahibliyi edir: “WUF13-ün Bakıda keçirilməsi Azərbaycanın dövlət başçısının apardığı güclü siyasətin nəticəsidir. Bu, Bakıda keçirilən birinci beynəlxalq tədbir deyil. Dünya ölkələrindən Vətənimizə bu cür beynəlxalq tədbirlərdə iştirak etmək üçün gələn çoxlu sayda millətlərin nümayəndələri hər zaman olub. Hamımız bilirik ki, bəzi ölkələr öz milli geyimlərini təbliğ edirlər. Xarici ölkələrdə olanda da bunu görürük. Səfirlər dövlət başçısı ilə görüşəndə, yaxud başqa dövlətlərin nümayəndələri səfir təyin olunanda əksəriyyəti milli geyimdə gəlir. Belə beynəlxalq tədbirlərdə də insanların milli geyimdə olmaları öz xalqlarına, dövlətlərinə olan münasibətin göstəricisidir. Biz buna pis yanaşmamalıyıq. Bu, həmin ölkənin öz daxili işidir. Bəzi insanların isə bunu gözü götürmür. "Mən də fikir bildirdim, mən də varam" demək istəyirlər, cılız fikirlərlə çıxışlar edirlər. Buna yol vermək olmaz. Azərbaycan sivil ölkədir. Xalqımız bütün millətlərin dinlərinə, əqidələrinə, adət-ənənələrinə hörmət edən xalqdır. Buna görə də belə yanaşmalar yanlışdır”.

C.Paşazadə Afrika ölkələrində insan hüquqlarının müdafiə olunmaması kimi fikirlərə isə belə cavab verib: “İnsan hüquqları məsələsi dünyanın hər bir bölgəsi üçün həssas və vacib mövzudur. Təəssüf ki, bu gün yalnız bir regionda deyil, Afrikanın bəzi ölkələrində də insanların sosial hüquqları, təhlükəsizliyi, təhsil və səhiyyə imkanları ilə bağlı ciddi problemlər mövcuddur. Biz hesab edirik ki, insan hüquqları məsələsinə seçici yanaşma olmamalıdır. Harada insan hüquqları pozulursa, beynəlxalq ictimaiyyət buna eyni həssaslıqla yanaşmalıdır. Azərbaycan hər zaman xalqlar arasında qarşılıqlı hörmətin, multikulturalizmin və dialoqun tərəfdarı olub. Problemlərin həlli ittiham dili ilə deyil, əməkdaşlıq, qarşılıqlı dəstək və beynəlxalq hüququn prinsipləri əsasında mümkündür. Afrikadakı xalqların da sülh, inkişaf və layiqli həyat hüquqları var və beynəlxalq təşkilatlar bu məsələlərə daha ciddi diqqət ayırmalıdır”.

Aytəkin Qardaşova