Avtomobillərə ziyan vuran sürücüyə nə qədər cəza verilib?

Ali Məhkəmədə yol nəqliyyat hadisəsi yerindən qaçmada, narkotik vasitələrin qanunsuz dövriyyəsində və xuliqanlıqda təqsirləndirilən Orxan Zülfüqarovun barəsindəki qərardan verilən kassasiya şikayəti üzrə məhkəmə iclası başa çatıb.

Pravda.az-ın əldə etdiyi məlumata görə, hakim Vidadi Cəfərovun sədrliyi ilə keçirilən prosesdə qərar elan olunub.

Qərara əsasən, təqsirləndirilən şəxsin Cinayət Məcəlləsinin 221.2.2 və 264-cü maddələri ilə təqsirləndirilməsi, Cinayət Məcəlləsinin 234.1-1-ci maddəsi ilə bəraət verilməsi barədə cinayət işi üzrə Bakı Apellyasiya Məhkəməsinin hökmü ləğv olunub və cinayət işi apellyasiya instansiya məhkəməsində yenidən məhkəmə baxışına təyin olunub. Kassasiya protesti təmin edilib.

İttihama görə, 2024-cü ildə Bakı şəhər DYP İdarəsinin əməkdaşları tərəfindən yol-nəqliyyat hadisəsi törətdiyi üçün “Opel” markalı, 77-DK-952 dövlət qeydiyyat nişanlı nəqliyyat vasitəsinin sürücüsünə “saxla” işarəsi verilsə də o, buna məhəl qoymayaraq paytaxtın mərkəzi küçə və prospektlərində nəqliyyat axınınına əks istiqamətdə hərəkətini davam etdirib. Görülən tədbirlər nəticəsində yol-hərəkəti qaydalarını davamlı şəkildə pozaraq digər hərəkət iştirakçılarının da həyatını təhlükəyə atan, ondan çox avtomobilə ziyan vuran sürücü Zülfüqarov Orxan Şahlar oğlu saxlanılıb və onun tibbi müayinədən keçməsi təmin olunub. Müayinə zamanı Orxan Zülfüqarovun narkotik vasitə qəbul etməsi də müəyyən edilib.

Tədbirlərin davamı kimi Orxan Zülfüqarovun idarə etdiyi nəqliyyat vasitəsinə baxış keçirilib və ümumi çəkisi 2,680 qram psixotrop maddə olan metamfetamin aşkar edilərək götürülüb.

Toplanılmış materiallar maddi sübutla birgə baxılması üçün aidiyyəti məhkəməyə göndərilib. Məhkəmənin qərarı ilə həmin şəxsin sürücülük hüququ 2 il müddətinə məhdudlaşdırılıb və narkotik vasitələrin qanunsuz dövriyyəsi ilə əlaqəli cinayətə görə barəsində 4 ay müddətinə həbs qətimkan tədbiri seçilib.

Bakı Ağır Cinayətlər Məhkəməsinin hökmü ilə o, 6 il müddətinə azadlıqdan məhrum edilib. Bakı Apellyasiya Məhkəməsinin qərarına əsasən, Orxan Zülfüqarov Cinayət Məcəlləsinin 234.1-1-ci maddəsi ilə təqsirliliyi sübuta yetirilmədiyindən ona həmin maddə ilə bəraət verilib, təqsirləndirilən şəxsin əməlinin Cinayət Məcəlləsinin 221.3-cü maddəsindən həmin Məcəllənin 221.2.2-ci maddəsinə tövsif edilməsi, həmin maddə ilə ona 1 il 9 ay müddətinə azadlıqdan məhrum etmə növündə cəza təyin edilməsi, hökmün onun Cinayət Məcəlləsinin 264-cü maddəsi ilə nəzərdə tutulmuş cinayət əməlini törətməkdə təqsirli bilinərək 2 il müddətinə nəqliyyat vasitələrini idarə etmək hüququndan məhrum edilməklə 1 il müddətinə azadlıqdan məhrumetmə cəzası təyin edilməsi hissəsində dəyişdirilmədən saxlanılıb. Cinayət Məcəlləsinin 66.2-ci maddəsinə əsasən təyin edilmiş cəzaları qismən toplamaq yolu ilə təqsirləndirilən şəxs 2 il müddətinə nəqliyyat vasitələrini idarə etmək hüququndan məhrum edilməklə 2 il 3 ay müddətinə azadlıqdan məhrumetmə cəzasının təyin olunub.

Kamal Məmmədov

Tarix: 26 May 2026, 08:36

Xəbər lenti