Təvəkkül Səlimov: "Şortik geyinən kişilərin tüklü ayaqlarını görəndə nəinki qadınların, hətta kişilərin özlərinin də nifrəti artır"

“Xalqın adət-ənənələri ilə məşğul olan adamam, milli dəyərlərə həmişə önəm vermişəm. Köynək alanda belə o köynəyin ətəyi az qala dizimə qədər çatırdı. Kişiliyin şortik geyinməklə əlaqəsi yoxdur, amma namus, qeyrət, abır-həyanın kiçik bir qismidir... Qadınlar dizdən bir qədər yuxarı geyinəndə sanki müəyyən gözəlliyi ehtiva edir. Kişilərin tüklü ayaqlarını görəndə nəinki qadınların, kişilərin də onlara qarşı nifrəti artır. Bu nədir, ayağını açanda adam iyrənir. Belə isti zamanda mən niyə şortiklə gəzmirəm, səni isti apardı? Nə olsun ki şortik kişilik əlaməti deyil, sən kişiliyini qoru, ananın, bacının, Azərbaycan qadınlarının yanında belə əndazəsiz geyinmə”.

Bu sözləri Pravda.az-a açıqlamasında tarix elmləri doktoru, professor Təvəkkül Səlimov Bakının İçərişəhər ərazisində şortik geyinən gənc oğlanla orta yaşlı kişi arasında baş verən mübahisəyə münasibət bildirərkən deyib.

Onun sözlərinə görə, kişinin hərəkəti düz olmasa da, gənc də geyiminə fikir verməli idi: “Geyim də bir abır-həya nişanəsidir və mən təhqir edən kişinin hərəkətinə haqq qazandırmıram. Çünki oğlan başa düşsəydi, özü elə geyinməzdi. Söyməklə, dədəsini, babasını təhqir etməklə düzələn deyil, onu gərək cəmiyyət özü qınasın. Mental dəyərlərimiz var. Cənab Prezident İlham Əliyev hər zaman qeyd edib ki, müasir qloballaşma şəraitində gərək gənclərimizi adət-ənənələrimiz əsasında tərbiyələndirək. Xalq o zaman xalq adlanır ki, onun özünəməxsus adət-ənənələri var və onu qorumağa səy göstərir. Ənənələr müqəddəsdir. Trampın bir geyimi var, baxın onun pencəyinə, şalvarına... Nə qədər aqressiv insan olsa da, amma geyimi nümunədir. Mən onu ev paltarında görməmişəm, həmişə kostyumda görürəm, xoş gəlir adama. Kişi gərək özünü abırdan salıb saytların müzakirələrinə düşməyəydi. Qoy oğullarımız qeyrətlə böyüsün. Bədən nümayişi ən sonuncu göstəricidir”.

T. Səlimov vurğulayıb ki, hazırda geyim firmaları çox qısa geyimlər istehsal edirlər və istənilən mağazada bunu görmək olur: “Təəssüf ki hazırda qızlar da şortiki ayaqla bədənin birləşdiyi hissəyə qədər geyinirlər. Qadınların qolunun altı görünməməlidir. Ayıbdı axı... Ayıbdır... Olmaz da, uzun geyinin! İndi dəbdir, çiyinin də bir tərəfini açırlar. Nə olub belə? Qızlar elə edirlər ki, göbəyi beş santimetr aşağı və yuxarı qalır bayırda, köynək çatmır axı, kürəyi də sümüklərinə qədər açıq qalır. O qızlara sözümü ünvanlayıram ki, mən onların babası yaşındayam. Belə qısa köynəklə göbəyinizi açıb həm əxlaqi dəyərləri heçə vurmayın, həm də sabah ərə gedəndən sonra qarın, belinizdə illər öncədən yaranmış soyuqlama prosesi uşaqsızlığa gətirib çıxarır. Təkcə abır-həya söhbəti deyil, həm də sağlamlıqdır. Elə köynək alıb geyinin ki, müzakirəyə səbəb olmasın. Toylarda dəfələrlə deyirəm ki, bəy gəlini vağzalı ilə gətirin. Gəncləri tərəkəməyə, vağzalıya öyrədin. Biz alimlər, tədqiqatçılar bilirik ki, pis adətləri, əməlləri bilə-bilə yayırlar. Sosial şəbəkələrdə və s. yerlərdə bilə-bilə yayırlar ki, əxlaqsızlıq baş alıb getsin. Geyim mədəniyyətimizi də itirmişik. Qışın günündə televiziyada aparıcı qolunun altı görünən nazik paltarla veriliş aparır. Rəhmətlik Vaqif Mustafazadə bığ saxlayırdı, onu televiziyaya buraxmırdılar, deyirdilər bığın uzundur. Koroğlunun da bığı uzun olub...”

Şəhanə Qədirli

Tarix: 9 İyun 2026, 13:14

Xəbər lenti