Hamiləlikdə nə yeyirsinizsə, körpəniz gələcəkdə onu seçəcək

Hər ana və körpə xüsusi olduğu kimi onların qida seçimləri də özünəməxsusdur. Bəs uşaqlarda ömür boyu davam edəcək qida üstünlüklərinin formalaşmasında doğumdan əvvəl və sonrakı dövrdə yaşanan dad təcrübələrinin böyük rol oynadığını bilirdinizmi?

Pravda.az bildirir ki, son araşdırmalara görə, hamiləlik dövründə müxtəlif və balanslı bəslənmək, uşağın gələcəkdə sağlam qidaları daha asan qəbul etməsini təmin edən ilk və ən vacib addımdır. Bəlkə də gələcəkdə tərəvəz sevən bir uşaq böyütməyin sirri elə hamiləlik dönəmində ana namizədinin öz boşqabına daha çox tərəvəz əlavə etməsindən keçir.

Dad hissinin ana bətnində başlayan inkişafı

İnsanda dad və qoxu ilə bağlı duyğuların inkişafı hələ ana bətnində ikən fəaliyyətə başlayır. Hamiləliyin son üçaylığında dad reseptor hüceyrələri dadetmə duyğusu ilə bağlı siqnalları mərkəzi sinir sisteminə ötürərək sormaq və üz ifadələri kimi refleksləri tənzimləyir. Bətndəki döl bu son dövrdə amniotik mayeni udmağa başlayır. Ananın qidalanması ilə birbaşa dəyişən amniotik mayenin dadı, körpənin ilk dad təcrübələrini formalaşdırır. Beləliklə, uşaqlar hələ real qidalarla tanış olmazdan əvvəl, dad və qoxu sistemləri vasitəsilə doğuma yaxın dövrdə ilk dad təcrübələrini qazanırlar. Bu dövrdə yaşanan müsbət və ya mənfi təcrübələr gələcəkdəki qida vərdişlərinin təməlini qoyur.

Ana bətnində yaşanan dad təcrübələri

Ananın istehlak etdiyi bəzi qidaların molekulları amniotik mayeyə keçir və bununla da həmin mayenin dadını dəyişdirir. Bununla da ana bətnindəki körpə fərqli dadlarla tanış olur. Məsələn, hamiləlik zamanı müntəzəm olaraq kök suyu içən və ya sarımsaq, reyhan kimi kəskin dadı olan qidalar qəbul edən anaların körpələri, süddən kəsiləndən sonra bu qidaları daha böyük iştahla qəbul edirlər. Körpə həmin dadları artıq "tanış və təhlükəsiz" olaraq kodlaşdırdığı üçün yeni qidalara qarşı qorxu və ya imtina hissi minimuma enir.

Gələcək nəsillərin sağlamlığı üçün düzgün qidalanma

Hamiləlik zamanı yalniz kalori miqdarına deyil, qidaların keyfiyyətinə də diqqət yetirilməlidir. İşlənmiş, həddindən artıq yağlı, şəkərli və süni qatqılı qidalar bətndəki körpənin maddələr mübadiləsini mənfi proqramlaşdıra bilər. Əksinə, mövsümi meyvə və tərəvəzlər, tam taxıllar, protein qaynaqları və sağlam yağlar fərqli dad çeşidləri yaradaraq körpənin dad palitrasını zənginləşdirir. Valideynlərin gələcəkdə uşaqlarına sağlam qidalanma vərdişləri qazandırmaq üçün çəkəcəkləri zəhmət, əslində ana bətnində atılan bu kiçik addımlarla xeyli yüngülləşir.

Əminə Bayramova

Tarix: 10 İyun 2026, 13:52

Xəbər lenti