“İdeal”ın sabiq rəhbərindən məşhur vəkilə ittihamlar - Muxtar Mustafayev deyir ki...

“İdeal” mağazalar şəbəkəsinin keçmiş sahibi İlqar İsmayılov tanınmış vəkil Muxtar Mustafayevə qarşı bir sıra ittihamlar səsləndirib.

İlqar İsmayılov Muxtar Mustafayevin onu təhqir etdiyini və hədələdiyini deyib.

“Məhkəmədə hakim Əfsanə Heydərovaya qarşı hörmətsizlik və açıq ölüm hədəsi edib. Şəxsi mesajlarında vətəndaşı “şərəfsiz” adlandıran, “məhv edəcəm”, “qanını içəcəm” deyən vəkil Muxtar Mustafayev təhdidlərinin miqyasını artıq cinayət müstəvisinə daşıyıb. Bu şəxs mənə göndərdiyi rəsmi mesajlarda açıq-aşkar “başın əldən gedə bilər” və “özü evi satmasa görəcək” deyərək məni rəsmən fiziki ölümlə hədələyir.

Özbaşınalıq bununla da bitmir. Məhkəmə iclasında bu şəxs dövlət adından ədaləti təmsil edən hakim Əfsanə Heydərova xanıma qarşı açıq hörmətsizlik nümayiş etdirib. Hakimin proses zamanı ona rəsmi xəbərdarlıq etməsinə məhəl qoymayaraq, məhkəmə zalında vəkil adına yaraşmayan aqressiv və qanunsuz hərəkətlərini israrla davam etdirib. Eyni zamanda rəsmi iclasda şəxsiyyətimi hədəf alaraq mənə qarşı “şərəfsiz”, “cinayətkar”, “vicdansız” kimi ağır təhqirlər yağdırıb. Bütün bu rəzalət — hakim Əfsanə Heydərova xanıma qarşı edilən kobud hörmətsizlik və mənə qarşı işlədilən təhqirlər məhkəmənin rəsmi video və audio çəkiliş qeydlərində rəsmən həkk olunub”.

Muxtar Mustafayev açıqlamasında bildirib ki, o, Yapı Kredi Bankın hüquqşünası kimi İsmayılovla məhkəmə çəkişməsindədir: “Onun banka xeyli borcu var. Həbsdə düşdü, ödəyə bilmədi. İllərlə proses getdi, mənzilindən çıxarılmadı. Bank onun durumunu başa düşdü. İndi özü mənzilini banka satıb, əlavə ödənişi də alıb. Amma evi boşaltmır. Bunun əvəzində başqa yol tutub. “Vicdansız” ifadəsinə gəlincə, burada nə təhqir, nə də qanunsuzluq var. Digər dedikləri isə uydurmadır. Mən neçə illərin vəkiliyəm, nə danışdığımın fərqindəyəm.Mülki Prosessual Məcəllədə bu anlayış nəzərdə tutulub. Mülki Prosessual Məcəllənin 47.1-ci maddəsində yazılır ki, işdə iştirak edən şəxslər, prosessual qanunvericiliklə onlara verilmiş prosessual hüquqlardan vicdanla istifadə etməyə borcludurlar. Bundan başqa həmin məcəllənin 120-ci maddəsi deyir: İş vaxtını itirməyə görə məbləğin tutulması Məhkəmə, vicdansızcasına əsassız iddia vermiş yaxud işə düzgün və tezliklə baxılmasına və onun həll edilməsinə ardıcıl surətdə maneçilik törətmiş tərəfdən, iş vaxtının itirilməsi üçün digər tərəfin xeyrinə məbləğ tuta bilər. Həmin məbləğ məhkəmə tərəfindən konkret hallar nəzərə alınmaqla ağlabatan miqdarda müəyyən edilir. Ondan yeganə tələb budur ki, satıb pulunu aldığı mənzili boşaltsın. Gununsesi.info

Tarix: 11 İyun 2026, 15:10

Xəbər lenti