Ali Məhkəmədə yol qəzası törətməkdə təqsirləndirilən G.Süleymanlının barəsindəki qərardan verilən kassasiya şikayətinə baxılıb.

Pravda.az-ın əldə etdiyi məlumata görə, hakim Zaur Hüseynovun sədrliyi ilə keçirilən prosesdə qərar elan olunub.

Qərara əsasən, kassasiya şikayəti təmin edilib, Bakı Apellyasiya Məhkəməsinin qərarı G.Süleymanlıya aid hissədə dəyişdirilib. Onun Cinayət Məcəlləsinin 263.2-ci maddəsi ilə əsas cəza kimi təyin edilmiş 5 il 2 ay müddətə azadlıqdan məhrumetmə cəzasının müddəti 4 il 6 aya endirilib. G.Süleymanlı cəzasını məntəqə tipli cəzaçəkmə müəssisəsində çəkəcək.

İttihama görə, hadisə 2023-cü ilin sentyabr ayında Bakı şəhərinin Xətai rayonu ərazisində baş verib.

Belə ki, “Toyota Prius” markalı avtomobili idarə edən G.Süleymanlı bitişik ərazidən əsas yola çıxarkən yol hərəkəti qaydalarının tələblərini pozub.

Məlumata görə, o, əsas yolda hərəkətdə olan nəqliyyat vasitəsinə yol vermədən hərəkət zolağına daxil olub və digər sürücülər üçün təhlükəli vəziyyət yaradıb. Həmin vaxt digər istiqamətdə “Opel Astra” markalı avtomobili idarə edən digər iş üzrə təqsirləndirilən Ə.Səlimli də yol hərəkəti qaydalarını pozaraq hadisə yerində icazə verilən sürət həddini aşıb. O, avtomobili saatda təxminən 65-70 kilometr sürətlə idarə edib. Halbuki həmin ərazidə icazə verilən maksimal sürət saatda 60 kilometr olub.

Sonra yol hərəkəti qaydalarının pozulması nəticəsində iki avtomobil arasında toqquşma baş verib. Ekspertiza rəyləri və iş üzrə toplanmış digər sübutlarla müəyyən olunub ki, hadisənin qarşısını almaq üçün hər iki sürücünün texniki imkanları mövcud olub. Lakin yol hərəkəti qaydalarının tələblərinə əməl edilməməsi qəzanın baş verməsinə səbəb olub.

Avtomobillərin toqquşmasından sonra nəqliyyat vasitələrindən biri təhlükəsizlik adacığında yolu keçmək istəyən hamilə qadın – G.Mehdiyevanı vurub.

Məhkəmə-tibbi ekspertizasının rəyinə əsasən, hadisə zamanı hamiləliyin 30-32-ci həftəsində olan qadının bətnindəki döl ağır bədən xəsarətləri alıb. Ekspertlər müəyyən ediblər ki, dölə baş və bədənin küt travması, baş beynin ağır dərəcəli əzilməsi, daxili orqanların əzilməsi kimi ağır xəsarətlər yetirilib. Həmin xəsarətlər nəticəsində dölün ölümü baş verib.

Araşdırmalar zamanı müəyyən edilib ki, hadisə nəticəsində G.Mehdiyevanın özü də çoxsaylı ağır xəsarətlər alıb. Onun baş və bədəninin müxtəlif nahiyələrində ağır travmalar, baş-beyin əzilməsi, daxili qanaxma, döş qəfəsinin əzilmiş yaraları, çoxsaylı qançır və sıyrıqlar qeydə alınıb.

Ekspertiza rəylərində qeyd olunub ki, qadının aldığı xəsarətlər həyat üçün təhlükəli olmaqla sağlamlığa ağır zərər vurma əlamətlərinə malik olub. Sonradan onun vəziyyəti ağırlaşaraq çoxsaylı orqan çatışmazlığı inkişaf edib. G.Mehdiyeva hadisədən bir neçə gün sonra xəstəxanada vəfat edib.

Toplanmış sübutlar, ekspertiza rəyləri, hadisə yerinə baxış protokolları və digər materiallar əsasında hər iki sürücüyə Cinayət Məcəlləsinin 263.2-ci maddəsi ilə ittiham irəli sürülüb.

Xətai Rayon Məhkəməsi işə baxaraq “Toyota Prius” markalı avtomobilin sürücüsü G.Süleymanlı yol hərəkəti qaydalarını pozaraq ehtiyatsızlıqdan insan ölümünə səbəb olmaqda təqsirli bilib. Məhkəmənin hökmü ilə ona 2 il 6 ay müddətinə nəqliyyat vasitələrini idarə etmək hüququndan məhrum edilməklə 5 il 2 ay müddətinə azadlıqdan məhrumetmə cəzası təyin olunub. Həmçinin onun cəzasını ümumi rejimli cəzaçəkmə müəssisəsində çəkməsi müəyyən edilib.

Hökmlə digər təqsirləndirilən Ə.Səlimli də Cinayət Məcəlləsinin 263.2-ci maddəsi ilə təqsirli bilinib və ona 1 il 6 ay müddətinə nəqliyyat vasitələrini idarə etmək hüququndan məhrum edilməklə 5 il müddətinə azadlıqdan məhrumetmə cəzası təyin edilib.

Birinci instansiya məhkəməsinin hökmündən hər iki məhkum, onların müdafiəçiləri, zərərçəkmiş şəxsin hüquqi varisi və dövlət ittihamçısı tərəfindən apellyasiya şikayətləri və protest verilib.

Bakı Apellyasiya Məhkəməsi məhkumların və müdafiəçilərinin şikayətlərini təmin etməyib. Bununla yanaşı, dövlət ittihamçısının protestini və zərərçəkmiş şəxsin hüquqi varisinin şikayətini əsaslı hesab edib. Apellyasiya instansiyasının qərarı ilə Ə.Səlimliyə təyin olunmuş cəza ağırlaşdırılıb. Belə ki, onun nəqliyyat vasitələrini idarə etmək hüququndan məhrum edilmə müddəti 2 il 6 aya, azadlıqdan məhrum etməcəzası isə 5 il 2 aya çatdırılıb. Beləliklə, hər iki məhkum barəsində eyni müddətdə cəza müəyyən edilib.

Daha sonra Ə.Səlimlinin müdafiəçisi kassasiya şikayəti ilə Ali Məhkəməyə müraciət edib. Ali Məhkəmə kassasiya şikayətinə baxaraq onu qismən təmin edib. Məhkəmə onun barəsində təyin olunmuş əsas cəzanın müddətini 8 ay azaldaraq 4 il 6 ay müəyyən edib. Həmçinin Ə.Səlimlinin cəzasını məntəqə tipli cəzaçəkmə müəssisəsində çəkməsi qərara alınıb.

Bundan sonra Bakı Apellyasiya Məhkəməsinin qərarından G.Süleymanlı tərəfindən də kassasiya şikayəti verilib.

Kamal Məmmədov