Bakının mərkəzində gəncə qarşı cinayət törədən şəxsin cəzası azaldıldı

Ali Məhkəmədə soyğunçuluqda təqsirləndirilən İsmət Əsədov və Malik Həsənlinin (hər ikisinin adı, soyadı şərtidir) barəsindəki qərardan verilən kassasiya şikayətinə baxılıb.

Pravda.az-ın əldə etdiyi məlumata görə, hakim Teyyub Muxtarovun sədrliyi ilə keçirilən prosesdə qərar elan olunub.

Qərara əsasən, kassasiya şikayəti qismən təmin edilib, Bakı Ağır Cinayətlər Məhkəməsinin hökmü ilə Cinayət Məcəlləsinin 180.2.1-ci (soyğunçuluq) maddəsi ilə təqsirli bilinərək məhkum olunmuş İsmət Əsədovun barəsindəki cinayət işi üzrə Bakı Apellyasiya Məhkəməsinin qərarı ona aid hissədə dəyişdirilib. İsmət Əsədovun cəzasının müddəti 2 ilə endirilib.

İttihama görə, İsmət Əsədov tanışı Malik Həsənli ilə birlikdə qabaqcadan əlbir olaraq özgənin əmlakını ələ keçirmək məqsədilə cinayət əlaqəsinə girib və paytaxtın mərkəzi hissəsində gənc şəxsin mobil telefonunu ələ keçirib.

Belə ki, hadisə 2024-cü il sentyabrın 6-da, saat 21 radələrində Bakı şəhərində yerləşən Bakı Musiqi Akademiyasının qarşısında baş verib.

İsmət və onun tanışı əvvəlcədən razılaşaraq yoldan keçən şəxslərin əmlakını ələ keçirmək məqsədilə hərəkət ediblər. Həmin vaxt zərərçəkmiş D.D. (adı, soyadı şərtidir) piyada şəkildə hərəkət edərkən Malik ona yaxınlaşıb və danışmaq bəhanəsi ilə mobil telefonunu istəyib. Zərərçəkmiş şəxs telefonunu həmin şəxsə təqdim etdikdən sonra onlar D.D.-yə məxsus əmlakı ələ keçiriblər. Əldə edilən əmlakın tərkibinə 500 manat dəyərində “iPhone 11” markalı mobil telefon, 10 manat dəyərində ekran qoruyucusu, 10 manat dəyərində telefon qabı və üzərində 11 manat danışıq konturu olan mobil nömrə daxil olub.

Beləliklə, zərərçəkmiş şəxsə ümumilikdə 541 manat məbləğində maddi ziyan vurulduğu müəyyən edilib.

İttihamda qeyd olunur ki, bundan sonra hadisələrin inkişafı əvvəlcədən razılaşdırılmış planın hüdudlarını aşıb. Belə ki, qrup üzvlərindən biri olan təqsirləndirilən şəxs digər iştirakçıların niyyəti ilə əhatə olunmayan hərəkətlər edərək zərərçəkmiş şəxsə qarşı zor tətbiq edib.

Məhkəmə materiallarına əsasən, o, zərərçəkmiş şəxsin üzərinə hücum edərək onun sifət nahiyəsinə bir neçə dəfə yumruq zərbəsi endirib. Zərbələrin təsirindən zərərçəkmiş şəxs yerə yıxılıb və müxtəlif bədən xəsarətləri alıb.

İş materiallarında göstərilir ki, hadisədən sonra təqsirləndirilən şəxslər əldə etdikləri əmlakla birlikdə hadisə yerindən uzaqlaşıblar.

Bakı Ağır Cinayətlər Məhkəməsinin hökmü ilə onlar 2 il 7 ay 29 gün müddətinə azadlıqdan məhrumetmə cəzasına məhkum edilib. Hökmdən apellyasiya şikayətləri verilib. Bakı Apellyasiya Məhkəməsinin araşdırmaları zamanı toplanmış sübutların düzgün qiymətləndirildiyi qənaətinə gələrək verilmiş şikayətləri təmin etməyib və Bakı Ağır Cinayətlər Məhkəməsinin hökmünü dəyişdirilmədən qüvvədə saxlayıb.

Daha sonra İsmət Əsədovun müdafiəçisi tərəfindən Bakı Apellyasiya Məhkəməsinin qərarından kassasiya şikayəti verilib.

Kamal Məmmədov

Tarix: 12 İyun 2026, 09:14

Xəbər lenti